Gothika (2003) – “විශ්වාසය” යනුවෙන් යමක් පවතිනවාද? එසේ පවතියි නම් අපට විශ්වාස කළ හැකිවන්නේ කවුරුන්වද? අපේ සමීපතමයන්ව ද?
නැහැ!
තමන් විසින් තමා ගැනම විශ්වාසයෙන් කටයුතු කරනවා හැරෙන්නට අපිට අන් අය කෙරෙහි විශ්වාසය තැබිය හැකි වන්නේ නැහැ.
තරුණ මනෝ වෛද්‍යවරියක් වුන Miranda Grey ජීවත්වුනේ Connecticut ප්‍රදේශයේ. රැකියාව නිම වීමෙන් පසුව එක්තරා රාත්‍රියක ඇය තම මෝටර් රථයෙන් නිවස වෙත පැමිණෙමින් සිටිනවා. පාර මැද තනිවම තරුණියක් සිටගෙන සිටිනු දකින Miranda ඇයව තම මෝටර් රථයේ ගැටීම වළකා ගැනීමට සිදුකරන උත්සාහයේදී Miranda ගේ රථය අනතුරට පත්වෙනවා.
දිගු නින්දකට පසුව ඇය අවදිවෙනවා. ඒත්..ඒ හුරුපුරුදු තැන නම් නොවෙයි. මේ තමාට හුරුපුරුදු තම නිවසේ සුවපහසු ඇඳ නෙවේ. මේ රෝහල් වාට්ටුවක්. ඇය කලබලෙන් වටපිට බලනවා. මේ තමන් සේවය කරන මානසික රෝහලේ වාට්ටුවක්. ඇයි තමන් රැඳෙවියෙකුගේ ඇඳුමක් ඇඳගෙන ඉන්නේ? මෙන්න එනවා …ඇගේ වෘත්තිය සගයා,වෛද්‍ය Pete Grahan. ඔහු එන්නේ ඇයට ප්‍රතිකාර කරන්න.
තමා සේවය කළ රෝහලේම රැඳෙවියෙකු ලෙසින් ප්‍රතිකාර ගන්නට ඇයට සිදුවුනේ ඇයි? චෝදනාව බරපතළ එකක්.
Miranda Grey විසින් තම සැමියා වූ Douglas ව පොරවකින් කපා කොටා ඝාතනය කර දමා තිබුනා. ඇය මේ බැව් දැනගන්නේ වෛද්‍යවරුන්ගෙන්. නැහැ!. තමන් කොහොමද එහෙම දෙයක් කරන්නේ? ඇය ඔහුට මොනතරම් ආදරය කළාද? ඔවුන් හරිම සතුටින් ජීවත් වුනා.
ඇය උමතුවෙන් ද?
තමා රිය අනතුරකට පත් වූ ඒ රාත්‍රිය ගැන Miranda සිහි කරනවා. මෙතැන විශාල පටලැවිල්ලක්,අබිරහසක් හෝ වෙනයම් දෙයක් ඇතිවග ඇයට තේරුම් යනවා. එදා රාත්‍රියේ නෙත ගැටුන දැන් දැන් තමාගේ දෑස් ඉදිරියේ නිරතුරුවම මැවෙන ඒ තරුණිය කවුද? තමා හෝ වෙනයම් අයෙක් Douglas ව ඝාතනය කළා නම් එයට හේතුව කුමක් ද?
ඔවුන් ඇයව රැඳෙවියෙකු කර,මෙහි සිරකොට,ආරක්ෂාව දමා ඇයට ප්‍රතිකාර ලබාදෙන්නට පටන් අරන්. ඉතින්,ඔවුන් ඇය කියන දේවල් පිළිගනියි ද?
you can’t trust somebody who thinks you’re crazy.
ඔබට පිස්සු කියලා හිතන අයව කොහොමටවත් විශ්වාස කරන්න එපා.
කාන්තාවක් චිත්‍රපටයක ප්‍රධාන චරිතය වුනාම,කතාව මෙහෙයවන්නෙ ඇය වුනාම ඒකෙ තියෙනවා හරි අපූර්වත්වයක්. ඇය ඇය ගැනම පමණක් විශ්වාසය තබා පරිස්සමින් ඉදිරියට යනවා.
Gothika (2003) ඔබ නොසිතන ආකාරයේ අවසානයක් කරා ඔබව රැගෙන යන අපූර්ව අත්දැකීමක්. Supernatural Horror /Psychological Thriller ගණයට අයත් මෙය Mathieu Kassovitz ගේ අධ්‍යක්ෂණයක්. Miranda Grey ලෙසින් Halle Berry ගේ රංගනය විශිෂ්ඨ එකක්. ඇය සමගින් Robert Downey,Penilope Cruz සහ Charles S.Dutton ඇතුළු රංගන ශිල්පීන් රැසක් රංගනයෙන් දායක වෙනවා.
