කොටහේනෙදී කොටහළුයි, අටමස්ථානෙදි ගොළුයි, නකල්ස් ළඟ විතරක් බුරයි
නකල්ස් වනාන්තරයේ ගල් ගුහාවකදී අනාරක්ෂිත දරු ප්රසූතියකට මුහුණ දුන් 15 හැවිරිදි දැරිය සහ ඇයගේ බිළිඳා වෙනුවෙන් කාන්තා හා ළමා කටයුතු අමාත්ය සරෝජා සාවිත්රි පෝල්රාජ් දක්වන අසීමිත සංවේදීතාව මේ වන විට මාධ්ය තුළ ප්රධාන මාතෘකාවක් වී තිබේ. මවක ලෙස තමන් එම සිදුවීමෙන් දැඩි කම්පනයට පත් වූ බව පවසමින් විශේෂ නිවේදන නිකුත් කිරීමටත්, දැරිය බැලීමට යෑමටත් ඇය කඩිනමින් පියවර ගෙන ඇත.
එහෙත්, ඇයගේ මෙම “ක්ෂණික මානුෂීය මැදිහත්වීම” දෙස බලන අපට අසන්නට සරල නමුත් තියුණු ප්රශ්නයක් තිබේ. ඒ, මීට මාස කිහිපයකට පෙර රටම හඬවමින් මියගිය කොටහේනේ 15 හැවිරිදි දෙමළ සිසුවියගේ සිදුවීමේදීත්, අටමස්ථානය ආශ්රිතව අපයෝජනයට ලක්වූ 15 හැවිරිදි දැරියගේ සිදුවීමේදීත් ඇයගේ මේ “මව් සෙනෙහස” කොහේ සැඟවී තිබුණේද යන්නයි.

කොටහේනේදී පෙත්සම් ඉල්ලූ නිලධාරිවාදය
2025 අප්රේල් මාසයේදී පාසල් ගුරුවරයෙකුගේ අපයෝජනයට සහ ටියුෂන් ගුරුවරයෙකුගේ ප්රසිද්ධ අවමානයට ලක්වීම නිසා කොටහේනේ 15 හැවිරිදි දිල්ෂි අම්ෂිකා සිසුවිය සියදිවි නසා ගත්තාය. දරුවා අහිමි වූ ශෝකයෙන් මුළු පවුලම වැලපෙද්දී, පාර්ලිමේන්තුවේදී ඒ ගැන ප්රශ්න කළ විට අමාත්ය පෝල්රාජ් කියුවේ කුමක්ද? “දැරියගේ දෙමාපියන් තමන් වෙත පැමිණ ලිඛිත පැමිණිල්ලක් හෝ පෙත්සමක් භාර දී නැති” බවයි. එපමණක් නොව, “සමාජ මාධ්ය හරහා යුක්තිය ඉටු කළ නොහැක” යනුවෙන් ඇය කළ ප්රකාශය දැඩි දෝෂදර්ශනයට ලක් විය. එදා චෝදනාවට ලක්වූ ටියුෂන් ගුරුවරයාට පාලක පක්ෂයේ දේශපාලන සම්බන්ධතා ඇති බවට පාර්ලිමේන්තුවේදීම චෝදනා එල්ල විය. දෙමළ සිසුවියකගේ ජීවිතය අහිමි වූ ඒ ඛේදවාචකයේදී, දෙමාපියන් තමන් ළඟට පෙත්සම් ගෙන එන තුරු බලා සිටි අමාත්යවරිය, නකල්ස් දැරිය වෙනුවෙන් කිසිදු පෙත්සමක් නොමැතිවම සංවේදී වී තිබේ.
අටමස්ථානයේ බලය ඉදිරියේ ගොළු වූ හැටි
කොටහේන සිදුවීමෙන් මසකට පසු, එනම් 2025 මැයි මාසයේදී අනුරාධපුර අටමස්ථානය ආශ්රිතව තවත් 15 හැවිරිදි දැරියක බරපතළ ලෙස අපයෝජනයට ලක්වීමේ සිදුවීම කරළියට ආවේය. එහි ප්රධාන සැකකරු වූයේ මෙරට බෞද්ධ සංස්ථාවේ ඉහළම සහ බලවත්ම තනතුරක් දරන අටමස්ථානාධිපතිය. සැකකරු අත්අඩංගුවට ගැනීමට දින 28ක් ප්රමාද වෙද්දී, විත්තිකරු වෙනුවෙන් නීතිඥවරුන් තිස් ගණනක් පෙනී සිටිද්දී, වින්දිත දැරියගේ මව පවා බන්ධනාගාරගත වී දැරිය තනි වෙද්දී, අමාත්ය පෝල්රාජ්ගේ හඬක් ඇසුණේම නැත. බලවත් ආගමික හා සමාජ බලවේග ඉදිරියේ දේශපාලන අවදානමක් ගැනීමට ඇය මැලි වූ බව එදා පැහැදිලිවම පෙනෙන්නට තිබුණි.




