ව්‍යාජ අනන්‍යතාවලට රැවටෙන්න එපා! – Identity (2025)
ගොඩක් දෙනා කැමතියි අනිත් අයව මෙහෙයවන්න. තමන්ගෙ බලය අනිත් අයට පෙන්නන්න. මෙතනදි ගොඩක් වෙලාවට සිද්ධ වෙන්නෙ රැවටීම. ව්‍යාජ “අනන්‍යතාවයක්” එහෙම නැතිනම් සැබෑව වසංකොට වෙස්මුහුණකින් මිනිස්සු රැවටීම. සත්‍යය නම් එවැනි ව්‍යාජ මිනිසුන්ට තමන්ගේම කියා අනන්‍යතාවයක් නැහැ. භයානකම දේ තමයි මේ වගේ අයට පුළුවන් ලෝකෙ තියෙන ඕනම නරක වැඩක් කරන්න. ගොඩක් වෙලාවට අපි කෙනෙක් ගැන තේරුම් ගන්නෙ ඔහු හෝ ඇය විසින් සමාජය ඉස්සරහ නිර්මාණය කෙරුව අනන්‍යතාවයෙන්. ඒ ව්‍යාජ අනන්‍යතාවයට පිටුපසින් ඇති සැබෑව ඊට හාත්පසින්ම වෙනස් අමිහිරි එකක් විය හැකියි.
යුවතියන් බ්ලැක්මේල් කරන, ඇඳුම් සාප්පුවක සේවකයෙක් වුණ අමර්ව නාඳුනන පුද්ගලයෙකු විසින් පුළුස්සා මරා දමනවා. සිද්ධිය පිළිබඳව පරීක්ෂණ මෙහෙයවීම පොලිස් පරීක්ෂක ඇලන්ට භාරවෙනවා. ඇලන්ට ඉන්නවා සිද්ධිය ඇසින් දුටු ඇලීෂා නම් වූ සාක්ෂිකාරිය. ඇලීෂා කියනව ඡායාරූපයකින් තමාට ඝාතකයව හඳුනාගත හැකි බව. ඒ අනුව ඔහු හරන් නැමති sketch artist ව ගෙනවිත් ඇලීෂගෙ විස්තරයට අනුව ඝාතකයව චිත්‍රයට නගන්නැයි පවසනවා. හරන් විසින් අඳින ලද චිත්‍රය හරන්ගේ මුහුණටම අතිශය පුදුම සහගත ලෙස සමාන බව පොලිස් පරීක්ෂක ඇලන්ට වැටහී යනවා. එසේනම් ඝාතකයා ඔහුද..?
සමහරවිට අපේ සමීපතමයන්ට පවා අපිට විශ්වාස කළ නොහැකි අනන්‍යතාවයන් තිබෙන්නට පුළුවන්. මිනිස් ස්වභාවය එයයි. කෙටි ජීවිත කාලයක් තුළ, තමන්වත් හරිහැටි නොදන්නා හේතුවක් මත ඇතැමුන් ව්‍යාජයන් සිදුකරමින්, අයහපත වපුරුවමින් ජීවත්වෙනවා. එවැනි අශිෂ්ට සමාජයක බොහොම කලාතුරකින් යුක්තිය උදෙසා සටන් වදින වීරයන් දක්නට ලැබෙනවා.
