තෙල් මිලේ සුළු වැඩිවීමක් විය හැකියි
ඉදිරියේදී ඉන්ධන මිල ඉහළ දැමුවද අප්‍රේල් මස මෙන් ඉහළ අගයකින් ඉහළ දැමීමේ කිසිදු අවශ්‍යතාවක් නොමැති අතර ඒ සම්බන්ධයෙන් මෙතෙක් කිසිඳු තීරණයක් ගෙන නොමැති බවත් ලංකා ඛනිජතෙල් නීතිගත සංස්ථාව සහ ලංකා තොග පර්යන්ත සමාගමේ කළමනාකාර අධ්‍යක්ෂ ආචාර්ය මයුර නෙත්තිකුමාරගේ පැවැසීය.
පසුගිය අප්‍රේල් මාසයේදී ඩීසල් බැරලයක මිල ඩොලර් 291.82 ක් දක්වා ඉහළ ගියද මේ වනවිට ඩීසල් බැරලයක් ඩොලර් 140ත් 150ත් අතර මිලක පවතින බව පැවැසූ ඔහු, ඒ හේතුවෙන් පසුගිය මස පැවැති පීඩනයද නොමැති බව සඳහන් කළේය.
කෙසේ වෙතත් මැදපෙරදිග යුද්ධයේ ඇරැඹීමත් සමග ඩොලර් 89ත් 91ත් අතර පැවැති ඩීසල් බැරලයක් ඩොලර් 150ක් දක්වා ඉහළ යාම නිසා ඇතැම්විට මිල සුළු වශයෙන් ඉහළ දැමීමට සිදු විය හැකි බවද පැවැසීය. ලබන ජූලි මස අවසානය දක්වා අවශ්‍ය ඉන්ධන තොග මෙරටේ ඇති බැවින් මෙම මස 28 සහ 31 යන දිනවල බොරතෙල් නෞකා දෙකක් මෙරටට ළඟා වීමට නියමිත බවත් ඒ මහතා සඳහන් කළේය.
