Zainab Jama නම් සෝමාලියානු රූ රැජින ඉන්දියාවේ තෙලන්ගනා හි පැවැත්වෙන 72 වැනි ලෝක රූ රැජින තරඟාවලියේ Head-to-Head Competition අදියරේදී සිදුකළ කතාබහට ලෝකයේම අවධානය යොමු වුණා. සෝමාලියානු සංස්කෘතියේ අංගයක් වන චර්මච්ඡේදනය (කාන්තා ලිංගේන්ද්‍රියේ බාහිර කොටස් කපා දැමීම) පිළිබඳව ඇය කතාබහ කළේ කුඩා දැරියක අවධියේ තමා එයට මුහුණපෑ අන්දම ගැන පවසමින්.
තමා අවුරුදු හතක දැරියක අවධියේදී මේ බිහිසුණු අත්දැකීමට මුහුණ පෑ ආකාරය ඈ පැවසුවා. මෙහිදී කිසිදු ලෙසකින්වත් වෛද්‍ය පිළිවෙතකට අනුකූල නොවන අන්දමින්, නිර්වින්දනය කිරීමක් නොකර අමු අමුවේම බ්ලේඩ් තල, කතුරු වැනි උපකරණ භාවිතයෙන් ලිංගේන්ද්‍රියේ බාහිර කොටස් කපා දැමීමෙන් පසු මුත්‍රා කිරීමට කුඩා සිදුරක් ලෙසින් ඉඩ සලසා තුවාලය මසා දමනු ලබනවා. වේදනාවෙන් කෑ ගැසූ තමාට එම ගැහැණුන් මේ සම්බන්ධව ආඩම්බර වන ලෙසින් පැවසූ වග Zainab Jama කඳුළු පිරි දෙනෙතින් යුතුව පවසා සිටියා.
ස්ත්‍රී චර්මච්ඡේදනය නම් වූ මේ අමානුෂීය කටයුත්ත පිළිබඳව ලොව වඩාත් කතාබහට ලක්වූයේ සෝමාලියානු නිරූපිකා වාරිස් ඩයිරිගේ (Waris Dirie) “කාන්තාරයේ කුසුම “(Desert Flower) පොත නිසාවෙන්. කෙසේවෙතත්, මේ අමානුෂික ක්‍රියාවලියේ අඩුවක් සිදුවී නොමැති බැව් පෙනී යන්නේ සෝමාලියානු කාන්තාවන්ගෙන් 98% ක්ම මෙම ක්‍රියාවට භාජනය වී ඇති බවත්, ඉතිරි 2% ඒ සඳහා වයස සම්පූර්ණ නොමැති ළදැරියන් බවත් පවසන Zanib Jama ගේ හෙළිදරව්ව නිසාවෙනි.
සමාජ ක්‍රියාකාරිනියක වශයෙන් විශාල මෙහෙවරක් සිදුකරන 23 හැවිරිදි සෝමාලියානු රූ රැජිනගේ මෙම කතාබහ සංස්කෘතිය, සම්ප්‍රදායන් නිසා අයිතිවාසිකම්, නිදහස අහිමි වූ මිලියන සංඛ්‍යාත ගැහැණුන්ගේ හඬකි. මෙවැනි මාතෘකාවක් ගෝලීය වේදිකාවක කතා කිරීමට ඇය ගත් තීරණය මානව හිමිකම් සඳහා වන සටනේ, බලවත් පියවරක් සනිටුහන් කරනු ඇත.
