තමිල්නාඩුවේ මීළඟ මහ ඇමැති තලපති

තමිල්නාඩුවේ මීළඟ මහ ඇමැති තලපති

ඉන්දියාවේ තමිල්නාඩු ප්‍රාන්ත සභා මැතිවරණයෙන්ආ සන 108 ක විශිෂ්ට ජයක් හිමි කර ගැනීමට සුපිරි නළු තලපති විජේගේ  තමිලග වෙට්රි කලගම් (TVK) පක්ෂය සමත් විය. ආසන 100 කට වැඩි ගණනක් දිනූ තනි පක්ෂය ලෙසද  එම පක්ෂය හැඳින්වේ.

ඉන්දීය මැතිවරණ කොමිසමේ මැතිවරණ දත්තවලට අනුව බලයේ සිටි මහ ඇමති එම්. කේ. ස්ටාලින් නායකත්වය දැරූ DMK පක්ෂය ආසන 59 ක් ද, ADMK පක්ෂය ආසන 47ක් ද ලබා ගෙන ඇත. තමිල්නාඩු ප්‍රාන්ත සභාවේ සරල බහුතරය ලබාගෙන ආණ්ඩුවක් පිහිටුවීම සඳහා ආසන 118 ක් ජයග්‍රහණය කළ යුතු වුවද විජේගේ පක්ෂය ලබාගෙන ඇත්තේ ආසන 108 ක් බැවින් ඔහු කුමන පක්ෂය සමග සන්ධානගත වන්නේ ද යන්න මෙතෙක් තහවුරු කොට නැත. කෙසේ නමුත් විජේ තමිල්නාඩුවේ මීළඟ මහ ඇමතිවරයා ලෙස දිවුරුම් දීමට වැඩි ප්‍රවණතාවක් පවතින බවට වාර්තා වේ. මැතිවරණ ජයෙන් පසු රජයක් පිහිටුවීම පිළිබඳව සාකච්ඡා කිරීමට විජේගේ TVK පක්ෂය තමිල්නාඩු ආණ්ඩුකාර රාජේන්ද්‍ර විශ්වනාත් අර්ලේකර් හමුවීමට අවස්ථාවක් ඉල්ලා ඇතැයි ද පැවසේ.

විජේ දේශපාලනයට අවතීර්ණ වී සිටින්නේ තමිල්නාඩු විජයග්‍රාහී පක්ෂය යන අරුත් ඇති ‘තමිල්ග වෙට්රි කසාගම්’ පක්ෂයෙනි. ‘තමිල්ග වෙට්රි කලගම්’ පක්ෂය පිහිටුවීම සිදුවූයේ 2024 දීය. තමිල්නාඩු ප්‍රාන්ත සභාව ආසන 234 කින් සමන්විතය. බහුතරය සඳහා ආසන 118 ක් දිනා ගැනිම කළ  යුතු වුවද තමිල්ග වෙට්රි කලගම්’ පක්ෂයට දිනා ගැනීමට හැකි වූයේ ආසන 108 ක් පමණි. තමිල්නාඩු මහ මැතිවරණය අප්‍රේල් 23 වැනිදා ආරම්භ වූ අතර ඡන්ද ප්‍රකාශ කිරීමේ ප්‍රතිශතය සියයට 85 කි. එය තමිල්නාඩු ඉතිහාසයේ වාර්තා වූ ඉහළම ප්‍රතිශතය බව මැතිවරණ බලධාරීහු ප්‍රකාශ කරති.

විජේගේ ‘තමිල්ග වෙට්රි කලගම්’ පක්ෂය මැතිවරණයට තරග කරමින් ජයග්‍රහණය ලැබුවේ තනියම වන අතර බහුතරය දිනා ගැනීමට නොහැකි වූ බැවින්, ඔවුන් ඔවුන්ට හිතවත් පක්ෂයක් හා සන්ධාන ගත වනු ඇත. ‘තමිල්ග වෙට්රි කසාගම්’ පක්ෂය මෙවර මැතිවරණයෙන් ඉදිරියට පැමිණීම, තමිල්නාඩු දේශපාලනයේ විශේෂ සන්දිස්ථානයකි. දශක ගණනක් තිස්සේ තමිල්නාඩු දේශපාලනයේ බලය මාරුවෙන් මාරුවට ඩී.එම්.කේ. පක්ෂය සහ ඒ.අයි.ඒ. ඩී. එම්. කේ. පක්ෂ අතරේ මාරු විය. තලපතිගේ ජයග්‍රහණයත් සමග දේශපාලන පොර පිටිය උඩුයටිකුරු වෙමින් පවතී.

ධාරා අබේනායක විසිනි.