President warns – නිලධාරීන්ට තම පරණ පුරුදු අත්හැර අලුත් වීමට කාලය පැමිණ ඇති තිබෙන බවත් එසේ වෙනස් වන්නේ නැත්තම් අනිවාර්යයෙන්ම වෙනස් කරන බවත් ජනාධිපති අනුර කුමාර දිසානායක පවසයි.
ඔහු මේ බව සඳහන් කළේ, අද (5) පැවති ජගත් පරිසර දින සැමරුම් උලෙළට කෑගල්ල නිදහස් මාවතේදී ය.
පරිසර විනාශයන් පසුපස දේශපාලන අධිකාරිය තිබෙන බවත් රටේ ප්‍රාදේශීය වැලි තොටුපළවලින් විශාල ප්‍රමාණයක් අයත් වන්නේ දේශපාලනඥයන්ට, එසේ නැත්නම් දේශපාලනඥයාගේ සමීපතමයෙකුට බවත් ජනාධිපතිවරයා පෙන්වා දුන්නේ ය.
මේ තත්ත්වය තමාට වඩා හොඳින් ජනතාව දන්නා කාරණයක් වන අතර වන විනාශය පිටුපසත් දේශපාලනඥයන් සිටින බවත් වනය විනාශ කිරීමට දේශපාලන අධිකාරියේ ආරක්ෂාව සහ රැකවරණය තිබු බවත් ඔහු චෝදනා කළේ ය.
“ඔබ ජීවය මරා දමන පංගුකරුවෙක් වෙන්න එපා. ඔබ ජීවය ලබා දෙන පංගුකරුවෙක් වන්න. ඊට අවශ්‍ය දේශපාලන රැකවරණය අපි ලබා දෙනවා. දේශපාලන අධිකාරිය යහපත්කරණයට ලක් වී තිබුණාට පැරණි නිලධාරි යාන්ත්‍රණය යම් කොටස් පැරැණි පුරුද්දෙන් ගැලවෙන්න අසමත් වී තිබෙනවා. පාස්පෝර්ට් දෙපාර්තමේන්තුවෙන් හොර පාස්පෝර්ට් හදපු නිලධාරීන් හමු වෙනවා. රේගුවෙන් භාණ්ඩ එළියට දාපු නිලධාරීන් හමුවෙනවා. පතල් කාර්යාංශයෙන් විවිධ ආක්‍රමිකතා කළ නිලධාරීන් හමු වෙනවා. ඒ නිසා අපි කියන්නේ පරණ පුරුදු අත්හැර අලුත් වෙන්න කාලේ ඇවිත් තිබෙනවා. මා නැවත නැවත මතක් කරන්නෙ වෙනස් වෙන්න නැත්තම් අපි වෙනස් කරනවා”
