Asia Cup 2025 – ආසියානු කුසලාන ක්‍රිකට් තරඟාවලියේ ඊයේ රාත්‍රියේ පැවති තීරණාත්මක තරඟයෙන් ඇෆ්ගනිස්ථානය ලකුණු අටකින් පරාජය කිරීමට බංග්ලාදේශය සමත් වුණා. තරඟයේ ප්‍රථමයෙන් පන්දුවට පහරදුන් බංග්ලාදේශ කණ්ඩායම නියමිත පන්දුවාර විස්ස අවසානයේ කඩුලු 05ක් දැවී ලකුණු 154ක් රැස් කළා. ටන්සිඩ් හසන් පන්දු 31කදී ලකුණු 52ක් රැස් කිරීමට සමත් වුණා.පිළිතුරු ඉනිම ක්‍රීඩා කළ ඇෆ්ගනිස්ථාන කණ්ඩායමට නියමිත පන්දුවාර විස්ස අවසානයේ සියලු දෙනා දැවී රැස් කරගත හැකි වුණේ ලකුණු 146ක් පමණයි.
තරඟයේ වීරයා සම්මානය දිනාගත් නසූම් අහමඩ් පන්දුවාර හතරකදී ලකුණු 11කට කඩුලු 02ක් දවා ගනිමින් බංග්ලාදේශයේ ජය මාවත විවර කළා. මෙම ජයග්‍රහණයත් සමග ආසියානු කුසලාන ක්‍රිකට් තරඟාවලියේ ‘බී’ කාණ්ඩය උණුසුම් වී තිබෙනවා. ඒ, තරඟාවලියේ අවසන් හතර දෙනාගේ වටයට පිවිසීම සඳහා එම කාණ්ඩයේ කණ්ඩායම් තුනකටම දැන් අවස්ථාවක් උදාවී තිබීම හේතුවෙන්. ශ්‍රී ලංකාව ද සිටින්නේ ‘බී’ කාණ්ඩයේයි.
ඒ අනුව ශ්‍රී ලංකාව සහ ඇෆ්ගනිස්ථානය අතර හෙට පැවැත්වෙන තීරණාත්මක තරඟයේ ප්‍රතිඵලය මත ආසියානු කුසලාන ක්‍රිකට් තරඟාවලියේ අවසන් හතර දෙනාගේ වටයට ‘බී’ කාණ්ඩයෙන් පිවිසෙන කණ්ඩායම් දෙක තීරණය වනු ඇති.
