Minister Ananda Wijepala – මේ වන විට පොලිස් සේවයේ පුරප්පාඩු 28,000 ක් පවතින බව මහජන ආරක්ෂක සහ පාර්ලිමේන්තු කටයුතු අමාත්‍ය ආනන්ද විජේපාල පවසනවා.
ඒ අනුව, පොලිස් නිලධාරීන්ගේ හිඟයක් පවතින බවයි අද (08) පාර්ලිමේන්තුවේදී අදහස් දක්වමින් අමාත්‍යවරයා සඳහන් කළේ.
පොලිස් සේවයේ පුරප්පාඩු 5,000 ක් සඳහා කඩිනමින් බඳවා ගැනීමට අනුමැතිය හිමිව ඇති බවද, ඊට අදාළ ගැසට් නිවේදනය මේ වනවිට පළ කර ඇති බවද, මේ වන විට උප පොලිස් පරීක්ෂක සහ පොලිස් කොස්තාපල් යන තනතුරු සඳහා අයදුම්පත් ලැබෙමින් පවතින බවද අමාත්‍යවරයා ප්‍රකාශ කළා.
මීට අමතරව, ඉදිරි මාස 03 තුළ පහළ ශ්‍රේණියේ පොලිස් නිලධාරීන් 5,000 ක් සඳහා උසස්වීම් ලබාදීමට බලාපොරොත්තු වන බවත්, පරීක්ෂණ ශ්‍රේණියේ සිටින නිලධාරීන් 1,500කටද උසස්වීම් ලබාදීමට නියමිත බවයි අමාත්‍යවරයා වැඩිදුරටත් ප්‍රකාශ කර සිටියේ.
