Ceftriaxone – ඖෂධ ආසාත්මිකතාවයක් හේතුවෙන් පේරාදෙණිය රෝහලේදී 57 හැවිරිදි රෝගියෙකු මියගොස් තිබෙනවා. කෑගල්ල ශික්ෂණ රෝහලේදී මියගිය 21 හැවිරිදි තරුණියගේ මරණයට හේතුවූ ප්‍රතිජීවක ඖෂධයම ආසාත්මිකතා වීම හේතුවෙන් මෙම මරණය සිදුව ඇති බවයි වාර්තා වන්නේ.
මෙම පුද්ගලයාට Ceftriaxone නම් ප්‍රතිජීවක මාත්‍රා දහහතරක් වෙන් වෙන් වශයෙන් ලබා දී තිබුණු අතර ඇතිවූ උදරාබාධයක් හේතුවෙන් රෝහල්ගත කර තිබුණා. ප්‍රතිජීවක ඖෂධය නිසා ඔහුට ජුලි 17 වෙනිදා ආසාත්මිකතා තත්වයක් ඇතිවූ බවත්,නිධන්ගත රෝගවලින් පෙළෙන අයෙක් වූ නිසා දැඩිසත්කාර ඒකකයට ඇතුළත් කළ රෝගියා ජුලි 18 වැනිදා මිය ගිය බවත් රෝහල් අධ්‍යක්ෂිකා වෛද්‍ය මිහිරි ප්‍රියංගනී පවසා සිටියා. වැඩිදුරටත් අදහස් දක්වමින් ඇය කියා සිටියේ රෝගියා නිධන්ගත රෝගවලින් පෙළෙන අයෙක් වූ නිසා මරණයට හේතුව ආසාත්මිකතාවමදැයි නිශ්චිතවම පැවසිය නොහැකි බවයි. ආසාත්මික ප්‍රතික්‍රියාව නිසාවෙන් මෙම මරණය සිදුවූ බව වෛද්‍යවරුන්ගේ අනුමානය බව පැවසු රෝහල් අධ්‍යක්ෂකවරිය මේ සම්බන්ධයෙන් වැඩිදුර පරීක්ෂණ සිදුවෙමින් පවතින බව සඳහන් කර සිටියාය.
