ක්‍රිකට් පුහුණුකරුවෝ පාලක මණ්ඩලයට නඩු දමති
ශ්‍රී ලංකා ක්‍රිකට් ආයතනයේ (SLC) අත්තනෝමතික තීරණ සහ පරිපාලන දුර්වලතා හේතුවෙන් මෙරට ක්‍රිකට් ක්ෂේත්‍රය නැවතත් දැඩි උණුසුම් තත්ත්වයකට පත්ව තිබේ. මීට පෙර ක්‍රීඩකයන්, අමාත්‍යවරුන් සහ විගණන අංශ සමඟ ගැටුණු ක්‍රිකට් පාලක මණ්ඩලය, මෙවර මෙරට ක්‍රිකට් ක්‍රීඩාවේ කොඳු නාරටිය බඳු වූ දේශීය පුහුණුකරුවන් සමඟ නීතිමය සටනකට අවතීර්ණ වී සිටී. තමන්ට සිදුවූ අසාධාරණය වෙනුවෙන් පුහුණුකරුවන් දස දෙනෙකුගෙන් යුත් කණ්ඩායමක් ක්‍රිකට් පාලක මණ්ඩලයට විරුද්ධව නඩු මඟට පිවිසීමට ගත් තීරණය මෙරට ක්‍රිකට් පරිපාලනයේ තවත් අඳුරු පැතිකඩක් ලෝකය හමුවේ නිරාවරණය කරන්නකි.
35 දෙනෙකුගේ සේවය අත්හිටුවීම
මෙම ගැටලුවේ මුල් ආරම්භය සනිටුහන් වන්නේ ශ්‍රී ලංකා ක්‍රිකට් ආයතනය විසින් ජාතික, ප්‍රාදේශීය සහ පාසල් මට්ටමේ සේවය කළ පුහුණුකරුවන් 35 දෙනෙකුට ආසන්න පිරිසකගේ සේවය හදිසියේම අත්හිටුවීමට හෝ කොන්ත්‍රාත්තු අලුත් නොකිරීමට ගත් තීරණයත් සමඟය. නව බඳවා ගැනීමේ ක්‍රියාවලියක් හඳුන්වා දීමේ මුවාවෙන් ක්‍රිකට් ආයතනය සිදුකර ඇති මෙම ක්‍රියාව නිසා වසර 15-20ක් වැනි දීර්ඝ කාලයක් තිස්සේ දිවයින පුරා දක්ෂ ක්‍රීඩකයන් රැසක් බිහිකළ ප්‍රවීණ පුහුණුකරුවන් රැසකට සිය රැකියා අහිමි වී තිබේ. නිසි ක්‍රියා පටිපාටියකින් තොරව, පූර්ව දැනුම්දීමකින් තොරව සහ කිසිදු සාධාරණ හේතුවක් නොදක්වා සිදුකර ඇති මෙම ඉවත් කිරීම් තමන්ට දැඩි වෘත්තීය සහ මානසික අසාධාරණයක් බව පීඩාවට පත් පුහුණුකරුවෝ පවසති. මේ හේතුවෙන් ඉන් ඉදිරියට ගිය පුහුණුකරුවන් 10 දෙනෙකුගෙන් යුත් ප්‍රධාන කණ්ඩායමක් සිය නීතිමය අයිතිවාසිකම් වෙනුවෙන් ක්‍රිකට් පාලක මණ්ඩලයට එරෙහිව අධිකරණය හමුවට යාමට මේ වන විට සියලු කටයුතු සූදානම් කර ඇත.
වන්දි නඩු සහ මහජන මුදල් නාස්තිය
ශ්‍රී ලංකා ක්‍රිකට් ආයතනය පුහුණුකරුවන් සහ කාර්ය මණ්ඩල සාමාජිකයන් අත්තනෝමතික ලෙස ඉවත් කර නඩු මඟට පැටලුණු පළමු අවස්ථාව මෙය නොවේ. මීට පෙර ශ්‍රී ලංකා ජාතික කණ්ඩායමේ ප්‍රධාන පුහුණුකරු ලෙස කටයුතු කළ චන්දික හතුරුසිංහ මහතාගේ කොන්ත්‍රාත්තුව කලින් අවසන් කිරීම හේතුවෙන් ඔහු ජාත්‍යන්තර ක්‍රීඩා බේරුම්කරණ අධිකරණය (CAS) හමුවේ ඩොලර් මිලියන ගණනක වන්දි ඉල්ලා නඩු පැවරීය. අවසානයේදී එම නඩුව සමථයකට පත් කරගැනීම සඳහා පමණක් ඇමරිකානු ඩොලර් 200,000 ක (රුපියල් කෝටි ගණනක) මුදලක් හතුරුසිංහට ගෙවීමට ශ්‍රී ලංකා ක්‍රිකට් ආයතනයට සිදුවිය. මීට අමතරව, මෑතකාලීන තොරතුරු අනාවරණය කරන්නේ විවිධ ක්‍රිකට් ආයතන ආශ්‍රිත නඩු කටයුතු සඳහා පමණක් නීතිඥ ගාස්තු ලෙස ශ්‍රී ලංකා ක්‍රිකට් ආයතනය රුපියල් මිලියන 680 කට අධික මහා ධනස්කන්ධයක් වැය කර ඇති බවයි. මහජනතාව සතු, ක්‍රිකට් ක්‍රීඩාවේ දියුණුව උදෙසා වැය කළ යුතු මෙවැනි මුදල්, පරිපාලකයන්ගේ හිතුවක්කාරී තීරණ නිසා නීතිඥයන්ට සහ වන්දි ගෙවීම් සඳහා නාස්ති කිරීම බරපතළ ජාතික අපරාධයකි.
