කොළඹ ජැටිය විතරක් ඉන්දියාවට දෙනව හාද..!
ශ්‍රී ලාංකීය දේශපාලනය තුළ ප්‍රතිපත්ති යනු බලය ලබාගැනීම සහ එය පවත්වාගෙන යාම මත ඕනෑම අවස්ථාවක වෙනස් කළ හැකි නම්‍යශීලී මෙවලම් සමූහයකි. වේදිකාව මතදී රටක් වටිනා ජාතික සම්පත් ගැන උගුර ලේ රහ වනතුරු කතා කරන නායකයන්, බලයේ පුටුවට ආ පසු ඒ සියල්ල අමතක කර දමන ආකාරය අලුත්ම දේශපාලන පෙරළියත් සමඟ නැවත වතාවක් ඔප්පු වී ඇත. මෙයට හොඳම සහ ආසන්නතම නිදසුන වන්නේ කොළඹ වරායේ නැගෙනහිර බහාලුම් පර්යන්තය (East Container Terminal – ECT) සම්බන්ධයෙන් එදා සහ අද සිදුවන මතවාදී පරස්පරතාවයි.
එදා වරාය අකර්මණ්‍ය කළ “රතු” සටන් සහ අනුරගේ පාර්ලිමේන්තු ගර්ජනාව
මීට වසර කිහිපයකට පෙර, කොළඹ වරායේ නැගෙනහිර පර්යන්තයෙන් 49%ක කොටස් ඉන්දියාවේ අදානි (Adani) සමාගම ඇතුළු විදේශීය පාර්ශ්ව වෙත පැවරීමට එවකට පැවති රජයන් උත්සාහ ගන්නා විට, ඊට එරෙහිව රට පුරා දැවැන්ත දේශපාලන කුණාටුවක් නිර්මාණය විය. එහිදී ඉදිරිපෙළ නායකත්වය ගත්තේ ජනතා විමුක්ති පෙරමුණ (JVP) ඇතුළු වාමාංශික බලවේගයන්ය. එදා වත්මන් ජනාධිපති අනුර කුමාර දිසානායක මහතා මන්ත්‍රීවරයෙකු ලෙස පාර්ලිමේන්තුව තුළ සෘජුවම ප්‍රශ්න කරමින්, වරාය වැනි උපායමාර්ගික ජාතික සම්පත් විදේශීය රටවලට හෝ බහුජාතික සමාගම්වලට පැවරීම රටේ ආරක්ෂාවට සහ ස්වාධීනත්වයට එල්ල වන මරු පහරක් බව තර්ක කළේය.
වැඩ වර්ජන සහ “අකුරට වැඩ කිරීම”
වරාය සේවක වෘත්තීය සමිති සමඟ අත්වැල් බැඳගත් එදා විපක්ෂය, කොළඹ වරාය පරිශ්‍රය තුළ දැවැන්ත වැඩ වර්ජන සහ “අකුරට වැඩ කිරීමේ” (Work-to-rule) ව්‍යාපාර දියත් කළේය.
රටම අඩාල කිරීමේ තර්ජනය
මුළු වරාය ක්‍රියාවලියම අඩාල කරමින් එදා කළ සටන් නිසා එවකට පැවති රජයන් ජාත්‍යන්තර ගිවිසුම්වලින් ඒකපාර්ශ්විකව පසුබැසීමට පවා තීරණය කළේය.
වේදිකාවේ සටන් පාඨ
“ජාතික සම්පත් කුණු කොල්ලයට විකුණන දේශද්‍රෝහී ආණ්ඩුවලට ඉඩ නොදෙමු” යන්න එදා ඔවුන්ගේ ප්‍රධානම මැතිවරණ සටන් පාඨය විය. “පරණ ක්‍රමයට බෑ, පෞද්ගලික අංශය ඕනෑ” කාලය රෝදයක් මෙන් කැරකී, එදා වරාය සටන් පිටුපස සිටි අනුර කුමාර දිසානායක අද රටේ විධායක ජනාධිපතිවරයාය. දැන් ඇසෙන්නේ එදා වරාය වර්ජන වේදිකාවල කියූ කතාවල මුළුමනින්ම අනිත් පැත්තයි. ආර්ථික සමුළුවලදී සහ ශ්‍රමික සමුළුවලදී අදහස් දක්වමින් වත්මන් පාලනය ප්‍රකාශ කරන්නේ, වරායේ පැරණි කළමනාකරණ ක්‍රමවේදයන් යටතේ තවදුරටත් ඉදිරියට යා නොහැකි බවයි. ඔවුන් විසින් ගෙන ඇති නවතම තීන්දුව නම් නැගෙනහිර බහාලුම් පර්යන්තයේ (ECT) කළමනාකරණය සහ මෙහෙයුම් අයිතිය විදේශීය නැව් සමාගම් සහ පෞද්ගලික ආයෝජකයන් වෙත පැවරීමට වත්මන් රජය තීරණය කර ඇත.
කොටස් විකිණීම
පර්යන්තය පාලනය කිරීම සඳහා නව කළමනාකරණ සමාගමක් පිහිටුවා, එහි කොටස් පෞද්ගලික අංශයට විකිණීමට කැබිනට් අනුමැතිය පවා ලබා දී තිබේ.
අලුත් තර්ක
එදා වරාය විදේශයන්ට දීම “දේශද්‍රෝහී” ක්‍රියාවක් ලෙස හැඳින්වූවද, අද ඔවුන් පවසන්නේ වරායේ පූර්ණ ධාරිතාවයෙන් ප්‍රයෝජන ගැනීමට සහ ආර්ථිකය පරිවර්තනය කිරීමට නම් ජාත්‍යන්තර මෙහෙයුම්කරුවන්ගේ සහය අත්‍යවශ්‍ය බවයි. “රට සතු අයිතිය” තමන් ළඟ තබාගෙන “මෙහෙයුම් අයිතිය” පැවරීම විකිණීමක් නොවන බවට දැන් අලුත් අර්ථකථන දේශපාලන වේදිකාවලින් ඇසෙන්නට තිබේ.
