ලෙමනේඩ් – Lemons
“ජීවිතය ඔබට ලෙමන් ලබා දෙන්නේ නම්, ඔබ එයින් ලෙමනේඩ් හදන්න.”
“ජීවිතය හැමවිටම ඔබට ලෙමන් ලබා දෙන අතර ඉන් හැමදාම ලෙමනේඩ් සැදිය නොහැක”
හැමදාමත් දවල් වී අවදි වූ ප්‍රකාශ් එලෙස සිතුවේය. ඔහුට නිරතුරුව නොසන්සුන් බවක් සහ බියක් දැණුනි. ඔහු සිය අපිළිවෙල කාමරය දෙස බැලුවේය. තමා හරියට ආත්මයක් නොමැති අයෙක් මෙනි. ඔහු දවස ගෙවා දැමීමටත්, ආදරය ලැබීමටත් ක්‍රමයක් සෙව්වේය. බොහෝ දෙනෙකුගේ මෙන්, පවුලේ අය කෙරෙන් ඔහු දුරස්ව ඇත. ඔවුන්ව රැක බලාගන්නට, තියෙන දේ සමග කටයුතු කරන්නට වී තිබුණත් ඔහුට කිසිවක්ම නොතිබුණේය. ඔහු කැඩපත දෙස බැලුවේය. සියල්ල අහිමි වීමට ඔන්න මෙන්න කියා සිටින, තමාගෙන් යැපෙන පිරිසක් සිටින නිසා වැඩ කළ යුතු අයෙකුගේ ප්‍රතිබිම්බය එහි ඇඳී තිබුණි. ඉතින් ඔහු අද දිනය වෙනුවෙන් පියවරක් තැබුවේය. ප්‍රකාශ් ජීවත් වුණේ නල ජලය නොමැති නිවසකය. සෑම දිනකම වතුර පුරවා ගැනීමට ඔහු ටැංකිය අසළට යයි. එතනට හරියටම වෙලාවට යා යුතුය. කොතරම් වේලාසන ගියත්, නිරතුරුවම එහි මිනිසුන් පෝලිම් ගැසී සිටියි. පමා වුණොත් වතුර නොලැබී යනු ඇත. එනිසා ප්‍රමාද නොවිය යුතුය. වාසනාවකට මෙන් ඔහු කලින් වතාවේ දවස් දෙකකට සෑහෙන ලෙස වතුර ගබඩා කර ගත්තේය. ඔහු මෑතකදී මිලට ගත් කුඩා උදුනෙන් වතුර රත් කර, සීතල වතුර හා උණු වතුර කවලම් කර පරිස්සමින් පාවිච්චි කිරීමට වග බලා ගත්තේය.
ඇඳුම් ඇඳගත් ප්‍රකාශ් ලැප්ටොප් බෑගයද රැගෙන වැඩ මුරය වෙනුවෙන් කාර්යාලයට ගියේය. ඔහුගේ කාර්යාලය, ගණන් කළ නොහැකි ව්‍යාපෘතිවල වැඩ කරමින් සිටි කාර්යබහුල තැනක් විය. සියල්ලෝම වැඩ කරමින් සිටියි. “මෝඩයෝ” ඔහු සිතුවේය. සමච්චල් සහගතව හිස වැනූ ඔහු තම අසුන වෙත ගියේය. ප්‍රකාශ් දවසේ කැමතිම මොහොත වූයේ හවස ටී බ්‍රේක් එකේදී කොෆි මැෂින් එක අසලදී මායා හමුවන මොහොතයි. වරින්වර ඇයව සිතට නැඟේ. ඇය දකින හැම විටෙකම ඔහු ඇය අසල ගැවසුණේය. ඔහු ඇය අසළින් එහෙ මෙහෙ වෙමින් සිටියද කිසි දිනෙක මායාට සමීප වූයේ නැත. දිනක්, ඇය තමාට අත වනන ආකාරය දුටු විට ඔහුට සතුටක් දැනුන මුත්, මොහොතකට පසු ඇය සැබවින්ම ඔහුට පිටුපස සිටින කෙනෙකුට අත වනන බව වැටහුණි. කලකිරුණු ප්‍රකාශ් ලෙමන් තේ එකක් රැගෙන තම කුටියට ගියේය. මොහොතකට පසු, මායා ආවේගශීලීව කාර්යාලයට කඩා වදින අයුරු දක්නට ලැබුණි. ඇය ප්‍රධානියාගේ මේසය උඩට කඩදාසි මිටියක් වීසි කළාය. ප්‍රකාශ් තිගැස්සී ගියේ මින් පෙර කවදාවත් ඇය ඒ අන්දමට හැසිරී නොමැති නිසාවෙනි. සියල්ලෝම තුෂ්ණිම්භූතව මේ සිදුවීම දෙස බලා සිටියහ.
“මෙතන මල ජරාවක්. මේක හිරගෙයක් විතරයි. අපි මෙතන ඉන්නකං මුන් අපෙන් ඌරන්ගෙන් වගේ වැඩ ගන්නවා. අහිංසක මිනිස්සුන්ගෙ සල්ලි එක්ක සෙල්ලම් කරනවා. අපි මුන්ගෙ වහල්ලු වගේ. උඹලා කාටහරි දියුණු වෙන්න ඕනෙනං මාත් එක්ක එනවලා. දැන්වත් අපේ කතාව අපිට ඕනෙ විදිහට ලියන්න ඕනෙ”
මායා කෝපයෙන් කෑ ගසමින් එළියට ආවාය. ප්‍රකාශ්ට දුක සිතුණි. ඉන්පසු ඇය කුණාටුවක් ලෙසින් කාර්යාලයෙන් පිටව ගියාය. තමා බලාපොරොත්තුවෙන් සිටි අවස්ථාව මෙය බව ප්‍රකාශ්ට වැටහුණි. ඇය ඔහුට මෙතෙක් කල් කිරීමට ධෛර්යය නොතිබූ දෙයක් කළාය. නැගී සිටි ඔහු, ‘ මම රස්සාවෙන් අස් වුණා’ යැයි තමාටම මුමුණා මායා කළ ලෙසින්ම කාර්යාලයෙන් ඉවතට ආවේය. ප්‍රකාශ් පාරට ආවේය. මායා ඈතට වී සිගරට්ටුවක් බොමින් සිටින අයුරු ඔහුට දකින්න ලැබුණි. තමාද රැකියාවෙන් ඉවත්වූ බව ඇයට කිව යුතුය. නමුත් ඔහු ඇය වෙතට යද්දීම ඇගේ හිතවතුන් ඈ වට කරගෙන, රැකියාවෙන් ඉවත්වීමට තිබූ ධෛර්යයට ප්‍රශංසා කළෝය. අනතුරුව ඇය මර්සිඩීස් AMG රියක නැගී පිටව ගියාය.
