මගේ ගෙදර රාත්තල් දෙසීයක බැටළුවෙක් හිටියා – Millie Bobby Brown
සුප්රකට Stranger Things කතා මාලාවේ රංගනයට එක් වෙන විට ඇයට වයස අවුරුදු 10 ක්. ජනප්රිය නිළි Millie Bobby Brown මේ වන විට නිෂ්පාදකවරියක් මෙන්ම ව්යාපාරික කාන්තාවක් ද වෙනවා. වයස අවුරුදු 14 දී යුනිසෙෆ් සංවිධානය සිය ලාබාලතම සුහද තානාපතිනිය ලෙසින් ඇයව නම් කළා. 21 හැවිරිදි මිලී මේ දිනවල මවක් ලෙසින් කාර්යබහුල ජීවිතයක් ගත කරනවා.
මීලී ඇගේ සැමියා Jake Bongiovi සහ දියණිය සමග මේ දිනවල ජීවත්වෙන්නෙ ජෝර්ජියාවේ ඇට්ලන්ටා සමීපයේ ගොවිපොලක. Stranger Things කතාමාලාවට අමතරව Netflix චිත්රපට ගණනාවකටම ඇය රඟපෑවා. රූපලාවන්ය නිෂ්පාදන සහ කෝපි සඳහා වන Florence by Mills වෙළඳ සන්නාමයේ හිමිකාරිය ඇයයි. මේ වන විට ඇයගේ Instagram followers ගණන මිලියන 64 කට අධිකයි. බොහෝ දෙනා පවසන්නේ ඇය ආත්ම විශ්වාසයෙන් යුතු, ප්රායෝගික චරිතයක් බවයි. කුඩා දියණියගේ වැඩවලට අමතරව මිලීගේ අළුත් ජීවිතය බල්ලන් 11 දෙනෙක්, පූසන් 4 දෙනෙක් සහ බැටළුවන් ඇතුළු සතුන් 40 ක් සමග කාර්යබහුල වී තිබෙනවා.
“ඉස්සර මගේ ගෙදර රාත්තල් 200 ක බැටළුවෙක් හිටියා, එයා මගේ තිර රෙදි එහෙම ඉරලා දානවා. “
ඇය පවසයි. ඔවුන්ගේ දියණිය හදාවඩා ගැනීමට ගත් දරුවෙක්. ඇය දරුවන් කිහිප දෙනෙක්ගේම මවක වීමට බලාපොරොත්තුවෙන් සිටින බව සඳහන්.
“මට ඇත්තටම ලොකු පවුලක් අවශ්යයි. තමන්ටම දරුවෙකු ලැබීම සහ දරුවෙක්ව දරුකමට හදා ගැනීම අතර වෙනසක් මට පේන්නෙ නැහැ. ඒක ලස්සන, විශ්මයජනක අත්දැකීමක්. ඒක අපිට ගොඩක් දේවල් උගන්නනවා. ජීවිතයේ පුංචි දේවල් හරි ලස්සනයි. අපි දෙන්නගෙ දවස් බබාගෙ හුරතලයෙන්, ආදරෙන් සහ හිනාවෙන් පිරිලා. ඒක කියල ඉවර කරන්න බැරි සතුටක්. අපි දෙන්නා හවුල් වෙලා බබාගෙ වැඩ කරනවා. ඔහු වගේ සැමියෙක් ලැබීම ගැන මට හරිම සතුටක් තියෙන්නෙ. ඔහු හොඳ තාත්තා කෙනෙක්.”
හොඳ පවුල් ජීවිතයක් ගෙන යෑමේ ආදර්ශය ඇයට ලැබුණේ ඇගේ දෙමාපියන්ගෙන් වෙන්නට ඇති. මිලීගේ පවුලේ අය දේශීය වෙළඳපොලේ පලතුරු සහ එළවළු විකිණීම සඳහා වඩාත් ප්රසිද්ධ උදවියයි. තමන් දෙමාපියන් සමඟ සිටීමට ගොඩක් කැමති දරුවෙක් බවත්, ඇගේ ජීවිතයේ ඇය ගන්නා සෑම තීරණයක් පිටුපසම ඔවුන් සිටින බවත් මිලී පවසනවා. කුඩා කාලයේ සිටම, රංගනයට අවතීර්ණ වෙනවිට, තම පියා තමන් පිළිබඳ දැඩි විශ්වාසයකින් පසුවූ බැව් ඇය පවසනවා. හොලිවුඩ්වල මුල් කාලය ඇයට ලේසි පහසු එකක් වුණේ නැහැ. අවසානයේ Stranger Things ඇයට වාසනාව උදා කළා. ඇය හොලිවුඩයට වඩා ජෝර්ජියාවට යෑම මිලීගේ දෙමාපියන්ගේ කැමැත්ත වුණා.
“ඔවුන්ට මා ඒ ලෝකයේ හැදී වැඩෙනවා දකින්න අවශ්ය වුණේ නැහැ. මම කරන දේට මම ආදරෙයි, නමුත් ඒ දේවල් මාව නිර්වචනය කරන්නේ නැහැ. පෞද්ගලික ජීවිතය පිළිබඳ අරමුණක් අපි හැමෝටම තිබෙනවා.”
