බොලීවියානු ගුවන් හමුදාවට අයත් භාණ්ඩ ප්‍රවාහන ගුවන් යානයක් අනතුරට ලක්වීමෙන් පුද්ගලයන් 15 දෙනෙකු ජිවිතක්‍ෂයට පත්ව තිබෙනවා.
එහිදි තවත් පිරිසක් තුවාල ලබා ඇති බවයි විදෙස් මාධ්‍ය වාර්තා කළේ.
බටහිර එල් ඇල්ටෝ නගරයේදි එම භාණ්ඩ ප්‍රවාහන ගුවන් යානය ධාවන පථයෙන් ඉවතට පැන අසල වාහනවලද ගැටී ඇති බව එරට ගුවන් සේවා නිලධාරීන් පවසනවා.
අනතුර සිදුවන අවස්ථාවේ සිය සාමාජිකයන් අට දෙනෙකු එම භාණ්ඩ ප්‍රවාහන ගුවන් යානයේ සිටි බවයි එරට ගුවන් හමුදාපතිවරයා පවසන්නේ.
එම භාණ්ඩ ප්‍රවාහන ගුවන් යානය බොලිවියානු මහ බැංකුව වෙත මුදල් නෝට්ටු ප්‍රවාහනය කරමින් සිටියදි අනතුරට ලක්ව ඇති බව එරට ආරක්‍ෂක අමාත්‍යාංශය පැවසුවා.
අනතුරවීමත් සමග භාණ්ඩ ප්‍රවාහන ගුවන් යානයේ තිබූ මුදල් නෝට්ටු විසිරී ගොස් ඇති අතර ඒවා රැගෙන යාමට එම ස්ථානයට පැමිණි පිරිසක් විසුරුවා හැරීම සදහා පොලීසිය විසින් කදුළු ගෑස් ප්‍රහාරයක් එල්ල කර ඇති බවද විදෙස් මාධ්‍ය වැඩිදුරටත් පැවසුවා.
