ෂර්ලොක් හෝම්ස්ට පණ දුන් නළුවා Jeremy Brett
ලෝකෙ බොහෝ දෙනෙක් ආදරේ කරන රහස් පරීක්ෂක චරිතය ෂර්ලොක් හෝම්ස් බවට සැකයක් නැහැ. ෂර්ලොක් හෝම්ස් පාඨකයන් අතරට ඇවිත් සියවසකට අධික කාලයක් ඉක්මවල ගිහින් තිබුණත් ඔහුගෙ ජනප්රියත්වය බිඳක්වත් අඩුවෙලා නැහැ. මේ කතා ඇසුරින් නිමැවුණ චිත්රපට, ටෙලි නාට්ය අසීමිතයි. ඕනම පාඨකයෙක්ට එක වතාවක් හරි හිතිලා ඇති ෂර්ලොක් හෝම්ස්ව හැබෑවටම මුණගැහෙන්න තිබුණනං, ඔහු ජීවත්වුණ ලන්ඩනයේ බේකර් වීදියේ 221B නිවහනට යන්න තිබුණනං කියලා. සර් ආතර් කොනන් ඩොයිල් පාඨක හිත්වල මැව්ව හෝම්ස්ව, ඔහු ගැන හැමදේම ඇස් ඉදිරියෙ මැව්ව වගේ ජීවමාන කළේ 1984 සිට 1994 කාලය අතර විකාශය වුණ Sherlock Holmes කතාමාලාව. ඒ කතා මාලාව තුළින්, තියුණු නෙත්වලින් හැම දෙයක්ම නිරීක්ෂණය කෙරුව, තරාතිරම නොබලා සෑම කෙනෙකුගෙම ගැටළු විසඳුව ලන්ඩනයේ විශිෂ්ටතම රහස් පරීක්ෂකයව ජීවමාන කළේ බ්රිතාන්ය නළු Jeremy Brett. ඔහු ඒ චරිතය තුළ ජීවත්වුණ බැව් පැවසෙනවා.
ඔහු ඉපදුණේ 1933 අවුරුද්දෙ නොවැම්බර් 3 එංගලන්තයේ Warwickshire වල. සහෝදරයන් හතර දෙනෙකුගෙන් බාලයා වූ ජෙරමි ඊටන් විද්යාලයෙන් අධ්යාපනය ලැබුවා. පුංචි කාලෙම ඔහුට ඕනෙ වුණේ නළුවෙක් වෙන්න. රංගනය හැදෑරූ ඔහු වේදිකා නාට්යවල රඟපෑවා. ඔහුගෙ දක්ෂකම නිසා Jeremy Brett කියන නම බොහොම ඉක්මන්ට මිනිස්සු අතරට ගියා. ශේක්ෂ්පියර් නාට්ය, BBC dramas වල රඟපෑව ජෙරෙමි හරිම ඉක්මනින් හොලිවුඩ් රංගනයට පිවිසුණා. My Fair Lady (1964) චිත්රපටයෙන් ඔහු විශාල රසික ආකර්ෂණයක් හිමි කරගත්තා. නිළියක් වූ Anna Massey එක්ක ජෙරෙමි විවාහ වුණේ 1970 අවුරුද්දෙ. ඔවුන්ගේ විවාහය දික්කසාදයෙන් කෙළවර වුණා. ඉන්පස්සෙ ඔහු ඇමරිකානු නිෂ්පාදකවරියක් වුණ Joan Wilson එක්ක විවාහ වුණත් 1985 වසරෙ ඇය මිය ගියායින් පස්සෙ ඔහු හුදකලාවට වැඩි වශයෙන් නැඹුරු වුණ බව පැවසෙනවා.
තමන් රඟපෑව අමාරුම චරිතය ෂර්ලොක් හෝම්ස් බව ඔහු වරෙක පවසා සිටියා. බොහෝ දෙනා පවසන්නෙ ඔහු ෂර්ලොක් හෝම්ස් චරිතය රඟපෑවා නොව ෂර්ලොක් හෝම්ස්ට හුස්ම දුන් බවයි. මේ කතාමාලාවෙ අරමුණ වුණේ ආතර් කොනන් ඩොයිල් ලිව්ව ෂර්ලොක් හෝම්ස් කතා ජීවමාන කිරීම. හෝම්ස්ගෙ හැසිරීම්, තියුණු බුද්ධිය, හුදකලාවට ඇති කැමැත්ත වගේ දේවල් පිළිබඳව ගැඹුරු අධ්යනයනක යෙදුන ජෙරෙමි චරිතයට උපරිම සාධාරණය ඉටු කළා. ඔහු තුළ වූ හුදකලාවද එයට බලපෑ බව සඳහන්. ෂර්ලොක් හෝම්ස්ට ජීවය දෙමින් සිටින අතරවාරයේම ජෙරෙමිගේ සෞඛ්ය තත්වය දුර්වල වෙන්න පටන් ගත්තා. ඔහු bipolar disorder වැනි මානසික අවපීඩන තත්වයන්ගෙන් පීඩා විඳි අතර ඒ සඳහා ලබා ගත් ඖෂධ හේතුවෙන් සිරුරේ බර වැඩිවීම සිදුවුණා. ලෙඩ රෝග මධ්යයේ වුවත් ඔහු ෂර්ලොක් හෝම්ස්ට පණ පෙවීම දිගටම සිදු කළා. මානසික සෞඛ්යය පිරිහී ගොස් තිබූ අවස්ථාවල පවා කැමරාව ඉදිරියේ ඔහු ලෝකයේ විශිෂ්ටතම රහස් පරීක්ෂකයාව ජීවමාන කළා. ඔහුගේ රඟපෑම් ලොවක් මවිතයට පත් කළා. ෂර්ලොක් හෝම්ස් චරිතය ජෙරමි බ්රෙට්ව ජනප්රියත්වයේ හිණිපෙත්ත කරා රැගෙන ගියා.
