IMF World Bank – පුද්ගලයන් 2900කට අධික පිරිසකට මරු කැදවමින් මෑතකදී සිදුවු භූමිකම්පාවද නොතකමින්, පසුගිය සදුදා මොරොක්කෝව නිවේදනය කළේ ජාත්‍යන්තර මුල්‍ය අරමුදලේ සහ ලෝක බැංකුවේ වාර්ෂික සමුළුව මෙම වසරේ ඔක්තෝබර් මාසයේදී Marrakech හි පවත්වන බවයි. සැප්තැම්බර් 8 වන දින රික්ටර් පරිමාණයේ ඒකක 6.8ක භූ කම්පනයක් සිදු වු ප්‍රදේශයේ සිට 72km පමණ දුරින් පිහිටා ඇති මෙම ලෝක උරුම නගරයේදී, ඔක්තෝබර් 9 සිට15 දක්වා මෙම සමුළුව පැවැත්වීමට නියමිත බවද සදහන්. ලෝක බැංකු සභාපති Ajay Banga, ජාත්‍යන්තර මුල්‍ය අරමුදලේ කළමණාකාර අධ්‍යක්ෂ Kristalina Georgieva සහ මොරොක්කෝවේ ආර්ථික අමාත්‍ය Nadia Fettah Alaoui යන අය ඒකාබද්ධ ප්‍රකාශයක් කරමින් කියා සිටියේ “පවතින තත්ත්වයන්ට අනුකූලව” මෙවර සමුළුව පවත්වන බවයි. මොරොක්කෝ බලධාරීන්ගේ දැඩි ඉල්ලීම මත ජාත්‍යන්තර මුල්‍ය අරමුදලේ සහ ලෝක බැංකුවේ නිලධාරීන් මෙම තීරණය ගත් බව ඔවුන්ගේ අදහසයි. මොරොක්කෝ බලධාරීන්ගේ බලාපොරොත්තුව මෙමගින් තම රටේ සංචාරක කේන්ද්‍රස්ථානයන් වෙත 10000 – 15000 අතර පිරිසක් ගෙන්වා ගැනිම බව වාර්තා වේ.
මෙහිදී වැඩිදුරටත් අදහස් දැක්වු ප්‍රධාන නිලධාරීන් තිදෙනා “අපි රැස්වීම් පවත්වන විට, ක්‍රියාත්මක වන සහන කටයුතුවලට බාධාවක් නොවන පරිදි සහ විපතට පත්වුවන්ට සහ මොරොක්කෝ ජනතාවට ගෞරවනීය ලෙස ඒවා පැවැත්වීමට වග බලා ගත යුතු බවත් මෙම අසීරු අවස්ථාවේදී, වාර්ෂික සමුළුව මෙහි පැවැත්වීමට කටයුතු සැලසීමෙන් ලෝක ප්‍රජාවට ඒත්තු යාවි කෙතරම් දුෂ්කර තත්ත්වයක සිටියත් මොරොක්කෝව සහ එහි ජනතාව තම ශක්තිය සහ ඔරොත්තු දීමේ හැකියාව ලොවටම පෙන්වා දුන් ආකාරය. අපිද මීට සහභාගීවන්නන් ලෙස ආරක්ෂාව සහතික කිරීමට කැපවී සිටිනවා” යනුවෙන් පවසා තිබේ. IMF කළමණාකාර අධ්‍යක්ෂවරයා පැවසුවේ, රැස්වීම වෙනත් ස්ථානයකට ගෙන ගියහොත් එය මොරොක්කෝවේ ආගන්තුක සත්කාර අංශයට “තරමක විනාශයක්” වනු ඇති බවට මොරොක්කෝ අගමැති තමාට ප්‍රකාශ කළ බවයි.
-Reuters ඇසුරෙනි-
Photo Credit: www.reuters.com
