Piku – ලස්සන ගැහැණු ළමයෙක් වුණු පීකුට කොල්ලෙක් බැල්ම දානව. ඇය ඔහුත් එක්ක දොඩමළු වෙමින් ඉන්න අතරවාරයේ එතැනට ඇගේ වයසක තාත්තා එනවා. පීකු කන්‍යාවියක් නොවන වග ඇගේ තාත්තා අර තරුණයට කියන අතර ඇයත් එතැනින් ඉවත්වෙන්නෙ ඒ ගැන එතරම් තැකීමක් නොකර. ඇයට තරුණයෙක් සමීප වෙන්න සූදානම් වෙනකොටම මේ දේ කලිනුත් සිද්ධ වෙලා තියෙන නිසා වෙන්න ඇති එය ඇයට සාමාන්‍ය දෙයක් වුණේ.
ගෘහ නිර්මාණ ශිල්පිණියක් වුන තිස් වියැති පීකු ජීවත්වුණේ ඇගේ තාත්තා සමගින්. පීකු ඉතාම කාර්යබහුල තරුණියක්. ඇය සම්ප්‍රදායිකත්වය මෙන්ම නූතනත්වයද කැටි කරගත් තරුණියක්. පීකු තමන්ගෙ රෝගී තාත්තව රැක බලාගත්තා. මේ වියපත් මිනිසා පීකු හැර වෙනත් කිසිවෙක් තමාට සාත්තු සප්පායම් කරනවට අකමැති, පෙන්වන තරම් රෝගයක් සැබෑවටම නැති, නිතරම කේන්ති ගන්න, තරමක කපටි පුද්ගලයෙක්. රැකියාවට අමතරව ඔහුට සාත්තු සප්පායම් කරන්නත්, ඔහු වෙනුවෙන් රැකියාව අතරතුරදි පවා නිවසට එන්නත් පීකුට සිදුවුණා. ඇගේ පියා සැබැවින්ම කරදරකාරයෙක්. නමුත් ඇය ඔහුට ආදරේ කළා. ඒ විතරක් නෙමෙයි කරදරකාරී නෑදෑයො කිහිපදෙනෙකුත් ඔවුන්ට සිටියා.
ඉතින් ඔවුන් තීරණය කරනවා කොල්කටාවට යන්න. ඇගේ රෝගී පියාත් තව බඩු බාහිරාදියත් රැගෙන කොල්කටාවට යන්න රියැදුරන් එතරම් කැමති නොවූවත් රානා නැමති රියදුරු කැමති වෙනවා මේ ගමන යන්න. මේ දිගු ගමන අතරතුරේදි ඔවුන් මුහුණ දෙන අපහසුතා, අත්දැකීම්, සුන්දර සිදුවීම් මේ කතාවෙ දිග හැරෙනවා. සමහරවිට ඒ ගමන ඇගේ ජීවිතයෙ ඉරණම් ගමනක් වෙන්න ඇති.
ප්‍රේමය වැනි කාරණා ජීවිතයට එතරම් ළඟා කරගත්තෙ නැති ඇයත්, බුද්ධිමත් පිරිමියෙක් වුන රානාත් අතර මේ ගමන අතරවාරයේදී හිතවත්කමක් දළුලන්න ගන්නව. ඒක සාමාන්‍යයෙන් බොලිවුඩ් සිනමාවෙ දකින්න ලැබෙන විදිහෙ ආදරයක් හෝ බොළඳ බැඳීමක් නොවෙයි. ඔවුන් සමහරවිට අනාගතේ දී ආදරේ කරයි. එය අවිනිශ්චිතයි. පීකු සුවිශේෂී වන්නේ සමාජයේ නිරතුරුව ඇස ගැටෙන දහසක් බාධක අපහසුතා මධ්‍යයේ ඒවාට පිළිතුරු සොයමින් ජීවත්වෙන්නට උත්සාහ කරන සාමාන්‍ය ගැහැණු ළමයෙකුගේ කතාව අපට පවසන සිනමාපටයක් වීම නිසාවෙනුයි.
