NPP – 2024 පාර්ලිමේන්තු මැතිවරණයේදී ඡන්ද 6,863,186ක් ලබාගත් ජාතික ජන බලවේගය, දිස්ත්‍රික් ආසන 141ක් සහ ජාතික ලැයිස්තුවෙන් ආසන 18ක් සහිත තුනෙන් දෙක ඉක්මවූ පාර්ලිමේන්තු බහුතරයක් හිමි කරගෙන තිබේ. සමස්ත ආසන සංඛ්‍යාව 159ක් වූ එය ප්‍රතිශතයක් ලෙස 61.56%කි.
මැතිවරණ ජග්‍රහණයෙන් පසු කැඳවා තිබු මාධ්‍ය හමුවක් ඇමතූ, ජාතික ජනබලවේගයේ ලේකම් ටිල්වින් සිල්වා ප්‍රකාශ කර සිටියේ ආණ්ඩුවකට තුනෙන් දෙකක බලයක් ලබානොදිය යුතු බවට ජනතාව තුළ විශ්වාසයක් පවතින බවත්, තමන් ඉල්ලා නොසිටි ඒ බලය ජනතාව විසින් තම ආණ්ඩුවට ලබාදී ඇති බවත් ය. මෙතැන් සිට, “ජනතාව ලබාදුන් එම අධික බලය පරෙස්සමෙන් පාවිච්චි කිරීමේ වගකීම” තමන්ට පැවරෙන බව ඔහු වැඩිදුරටත් පවසා සිටියේය. එමෙන්ම කලුතර දිස්ත්‍රික්කයෙන් වැඩිම මනාප ප්‍රතිශතයක් ලබාගනිමින් පාර්ලිමේන්තුවට තේරී පත්වූ ජාතික ජනබලවේගයේ පාර්ලිමේන්තු මන්ත්‍රී වෛද්‍ය නලින්ද ජයතිස්ස සිය ජයග්‍රහණයෙන් පසු මාධ්‍ය වෙත අදහස් දක්වමින් කියා සිටියේ “තුනෙන් දෙකක් වැනි අධික බලයක් ආණ්ඩුවක් ලෙස ඔවුන්ගේ හිසට බරක්” බවය.
