Mahinda and Sirisena හිටපු ජනාධිපති වරුන් ලෙස මහින්ද රාජපක්ෂ සහ මෛත්‍රීපාල සිරිසේන ශ්‍රී ලංකා ගුවන් හමුදාව සතු හෙලිකොප්ටර් යානා යොදා ගනිමින් ගුවන් සංචාරය කල වාර ගණන හෙළිදරව් වී තිබෙනවා. හිටපු ජනාධිපති මහින්ද රාජපක්ෂ 2005 සිට 2015 දක්වා කාලය තුල අභ්‍යන්තර ගුවන් ගමන් සඳහා ගුවන් හමුදා හෙලිකොප්ටර් භාවිතා කරමින් ගුවන් ගමන් 978 ක් සිදු කර ඇති අතර හිටපු ජනාධිපති මෛත්‍රීපාල සිරිසේන සිය පස් අවුරුදු ධුර කාලය තුළ ගුවන් ගමන් සඳහා 557 වතාවක් හෙලිකොප්ටර් යොදා ගෙන ඇති බව ශ්‍රී ලංකා ගුවන් හමුදා මූලස්ථානයෙන් තොරතුරු ලබා ගැනීමේ අයිතිය යටතේ ලබාගත් තොරතුරු වලින් අනාවරණය වෙනවා.
ගුවන් හමුදා මූලස්ථානයෙන් 2022 දෙසැම්බර් 5 වන දින මුලින් ඉල්ලා සිටි තොරතුරු සැපයීම ප්‍රතික්ෂේප කිරීමෙන් පසු “අද” පුවත්පත විසින් තොරතුරු දැනගැනීමේ අයිතිය පිළිබඳ කොමිෂන් සභාව වෙත කරන ලද අභියාචනයකට ප්‍රතිචාර වශයෙයි ශ්‍රී ලංකා ගුවන් හමුදාව මෙම තොරතුරු ලබාදී තිබෙන්නේ.
“අද” පුවත්පත තොරතුරු දැනගැනීමේ අයිතිය පිළිබඳ කොමිෂන් සභාවට කරන ලද එම අභියාචනයකට අනුව, කොමිසම විසින් 2024.01.04 දින අභියාචනා අංක RTIC/Apeal/398/2023 යටතේ ගුවන් හමුදා මූලස්ථානය වෙත නියෝගයක් නිකුත් කිරීමෙන් පසු, 2024 ජූලි 11 වන දිනගුවන් හමුදා මූලස්ථානය තොරතුරු ලබා දී ඇති නමුත් ලබා දී ඇත්තේ ඉල්ලා සිටි තොරතුරු වලින් කොටසක් පමණකි.
හිටපු ජනාධිපති මෛත්‍රීපාල සිරිසේන ජනාධිපති වරප්‍රසාදය යටතේ වසර පහක පාලන කාලය තුළ 557 වතාවක් අභ්‍යන්තර ගුවන් ගමන් කර ඇති බව එම තොරතුරු අනාවරණය කරයි. ඔහු මෙම අභ්‍යන්තර ගුවන් ගමන් හරහා කිලෝමීටර් 131,277.17 ක සම්පූර්ණ දුරක් ගෙවා ඇත. හිටපු ජනාධිපති මහින්ද රාජපක්ෂ ගමන් කල වාර ගණන හැර දුර ප්‍රමාණය තොරතුරු වල වාර්තා වී නොමැත.
