Nandalal Weerasinghe – ශක්තිමත් මූල්‍ය ප්‍රතිපත්ති හා තීන්දු තීරණ හේතුවෙන් අපේක්ෂා කළාට වඩා වැඩි වේගයකින් ශ්‍රී ලංකාව පැවතී ආර්ථික අර්බුදයෙන් ගොඩ ආ බවත්, එම තත්වය බිම් මට්ටමට සිදුවිය හැකි බලපෑම් සහ අභියෝග අවම කරගෙන එලෙසම ඉදිරියට ගෙන යා යුතු බවත්, මෙම තත්ත්වය වෙනස් කළහොත් රට යළි දෙවසරකට පෙර පැවැති තත්ත්වයට යා හැකි බවත්, මහ බැංකු අධිපති ආචාර්ය නන්දලාල් වීරසිංහ අනතුරු අඟවයි. ඔහු මේ බව සඳහන් කළේ, ශ්‍රී ලංකා වෘත්තීය සංගම් සංවිධානයේ 37 වන වාර්ෂික සමුළුව අමතමිනි.
එහිදී වැඩිදුරටත් අදහස් දැක්වූ මහා බැංකු අධිපතිවරයා ” පවතින ප්‍රතිසංස්කරණ ක්‍රියාවලිය, ආර්ථිකයේ මැදිකාලීන සහ දීර්ඝකාලීන වර්ධනයට අවශ්‍ය වන පරිදි සකසා ඇති බැවින්, එය කෙටිකාලීනව වේදනාකාරී වුවත්, ආර්ථිකයේ පුර්ණකාලීන වර්ධනය සඳහා දිගු කාලයක් පමාවී තිබූ මෙම ප්‍රතිසංස්කරණ ක්‍රියාවට නැංවීම සඳහා සියලු පාර්ශ්වයන්ගේ කැපවීම වැදගත් බවත්, ළඟා කරගත් ප්‍රතිඵල ආපසු හැරවීමක් සිදුවුවහොත් ප්‍රතිසංස්කරණ ක්‍රියාවලියට දැඩි පීඩනයක් එල්ලවන බවත්, ඉහළ වැය කිරීම් සහ බදු අඩු කිරීම් මඟින් ආර්ථිකය වර්ධනය කරා යොමු කිරීම සඳහා රජයට කිසිදු මූල්‍ය අවකාශයක් නොමැති ” බවත් පවසා සිටියේය.
