Google Account වසර දෙකක කාලයක් කිසිඳු භාවිතා කිරීමක් සිදු නොකොට පුර්ණ ලෙස අක්‍රියව පවතින Google ගිණුම් මකා දැමීමට එම සමාගම තීරණය කොට තිබේ. අද [අගෝස්තු 19] විද්‍යුත් තැපෑල හරහා සිය සේවා දායකයින් වෙත පණිවිඩයක් යොමු කරන එම සමාගම සඳහන් කරන්නේ මෙම තීරණය 2023 දෙසැම්බර් මස 1 වනදා සිට ක්‍රියාත්මක බවයි.
එය සිදුවන ආකාරය:
ඔබගේ ගිණුම වසර දෙකක් තිස්සේ කිසිඳු ආකාරයක Google සේවාවක් සඳහා භාවිතා නොකොට පුර්ණ වශයෙන් එය අක්‍රියව පැවතියේනම් පමණක් මිස ඔබ මෙම අවධානමට මුහුණ දෙන්නේ නැත. එසේ අක්‍රියව ඇත්නම් එම ගිණුම් මකා දැමීමට Google සමාගමට බලය ඇති අතර එය ආරම්භ කිරීමේ පළමු දිනය ලෙස ඔවුන් සඳහන් කර ඇත්තේ දෙසැම්බර් මස පලවෙනිදාය. තවද, එම ගිණුම් මකා දැමීමට පෙර ඔබ එම ගිණුම් සැකසීමේදී සමාගමට ලබාදී ඇති Recovery Email එකට සහ ඔබගේ පෞද්ගලික ඊ මේල් ලිපිනයට ඒ පිළිබඳව මතක් කිරීම් කිහිපයක් ලැබෙනු ඇත. එය අවම වශයෙන් ඔබගේ ගිණුම මකා දැමීමට මාස අටකට පමණ පෙරවත් සිදුකරන බව Google සමාගම පවසයි. යම් හෙයකින් ඔබගේ ගිණුම එම සමාගම විසින් මකා දැමීමක් සිදුකළහොත් ඔබට නව ගිණුමක් සකසා ගැනීම සඳහා අවස්ථාව තිබෙන අතර ඒ සඳහා කිසිසේත්ම මකා දැමූ ගිණුම සඳහා භාවිතා කළ Gmail ලිපිනය නැවත භාවිතා කළ නොහැක.
ඔබගේ ගිණුම මකා දැමීම වළක්වා ගන්නා ආකාරය:
ගිණුමක් සක්‍රීයව තබා ගැනීමට ඇති සරලම ක්‍රමය නම් අවම වශයෙන් වසර දෙකකට වරක්වත් ගිණුමට ඇතුල් වී එය භාවිතා කර තිබීමයි. පසුගිය වසර දෙක තුළ ඔබගේ Google ගිණුමට ඇතුල්වී එය භාවිත කර ඇත්නම්, ඔබගේ ගිණුම සක්‍රිය ලෙස සළකනු ලබන අතර මකා නොදමනු ඇත. එලෙසම ගිණුම සක්‍රියව තබා ගැනීමට පහත සඳහන් ක්‍රම අනුගමනය කර තිබීමද අදාළ වේ.
-ඊමේල් කියවීම හෝ යැවීම
-Google Drive භාවිතා කරමින්
YouTube වීඩියෝ නැරඹීම.
-ඡායාරූප බෙදා ගැනීම
App බාගත කිරීම.
-Google සෙවුම් භාවිත කිරීම.
-තුන්වන පාර්ශවීය App හෝ සේවාවන් සඳහා සම්බන්ධ වීමට Google ගිණුම භාවිතා කිරීම.
මිට පරිබාහිරව YouTube නාලිකා සහ Google Play තුළ App වැනි දේ ඇති විශේෂ Google Account වෙනුවෙන් අතිරේක උපදෙස් මාලාවක් සකසා ඇති හෙයින් වැඩි විස්තර සඳහා පහත යොමුවලට පිවිසීමෙන් ඔබට වැඩි විස්තර දැනගත හැකිය.
Inactive Google Account Policy
How Google retains data we collect
Updating our inactive account policies
-Google Account inactivity policy ඇසුරෙනි-
