GHF නොහොත් ගාසා මානුෂීය පදනම පසුගිය මැයි මස අගදී ගාසා තීරයේ විපතට පත් ජනතාව වෙනුවෙන් ආධාර බෙදාදීම ඇරඹීමත් සමගින් ඊශ්‍රායල හමුදාව කුසගින්නේ පෙලෙන ජනතාව වෙඩි තබා මරාදැමීමට පටන් ගත් අතර ඒ හේතුවෙන් මේ වන විට 400 කට අධික පිරිසක් ඝාතනයට ලක් වී තිබේ. එමෙන්ම 1000 කට අධික පිරිසක් තුවාල ලබා තිබෙනවා. ගාසා තීරයේ අල් ෂිෆා රෝහලට තුවාලකරුවන් නිතර රැගෙන එන අතර රෝහලේ හදිසි වාට්ටුව ලේ විලක් බවට පත් ව ඇති බවත් ප්‍රතිකාර නොලැබ මිය යන්නන්ගේ සංඛ්‍යාව දිනෙන් දින ඉහළ යමින් පවතින බවත් වාර්තා වෙනවා.
ආධාර ට්‍රක් රථ සමීපයට මිනිසුන් ළඟා වෙද්දී පූර්ව දැනුම්දීමකින් තොරවම ඊශ්‍රායල හමුදා ඔවුන්ට වෙඩි තබන බව සාක්ෂිකරුවන් පවසනවා. පලස්තීන සරණාගතයන් සඳහා වූ එක්සත් ජාතීන්ගේ සහන සහ වැඩ ඒජන්සියේ (UNWRA) ප්‍රධානියා මෙය “මරණයේ උගුලක්” බව ප්‍රකාශ කර සිටියා. UNWRA ප්‍රධානියා වන Phillippe Lazzarini අඟහරුවාදා ( ජුනි 24) ප්‍රකාශ කර සිටියේ ගාසා තීරයේ ආහාර බෙදා දීමේ ක්‍රියාවලිය මානුෂීයත්වයට අවමන් කරන පිළිකුල් සහගත ක්‍රියාවක් බවයි. එක්සත් ජාතීන්ගේ සංවිධානය GHF හා වැඩ කිරීම ප්‍රතික්ෂේප කර ඇත්තේ එය හමුදා අරමුණුවලට ඉඩ සලසන බව පවසමින්. මේ අතර ජාත්‍යන්තර නීතිවේදීන්ගේ කොමිසම තවත් කණ්ඩායම් 14 ක් හා එක්ව ගාසා තීරයේ හමුදාකරණය වූ මානුෂීය ආධාර මෙහෙයුම් වහාම නතර කරන ලෙස ඉල්ලා සිටියා.
– Al Jazeera ඇසුරිනි –
