Tiran Alles – සංවිධානාත්මක අපරාධ වලට සම්බන්ධ බවට චෝදනා ලැබ, මෙරට අධිකරණයකින් ඇප ලබා සිටියදී, විදෙස් රටකට පලා ගියේයැයි පැවසෙන කංජිපානි ඉම්රාන් නමැත්තා විදෙස් රටකදී අත්අඩංගුවට ගත් බවට සමාජ මාධ්යවල පළ වන වාර්තා අසත්ය බව මහජන ආරක්ෂක අමාත්ය ටිරාන් අලස් පවසයි. පසුගියදා පැවති මාධ්ය හමුවකදී මේ පිළිබඳව පැහැදිලි කළ අමාත්යවරයා, ඔහු මේ වනවිට සිටින ස්ථානය තමා දන්නා බවත්, එය මාධ්ය වෙත හෙළි නොකරන බවත් ප්රකාශ කළේ ය.
එහිදී වැඩිදුරටත් අදහස් දැක්වූ මහජන ආරක්ෂක අමාත්යවරයා “සමාජ මාධ්ය ඔස්සේ ඇතැම් පිරිස් පවසන ආකාරයට කංජිපානි ඉම්රාන් සිටින තැන නිවැරැදි නැහැ. සමහරු පවසන්නේ එම කටයුතු ඔවුන්ට භාර දෙන්න, එවිට ගෙනල්ලා දෙන බව. නමුත් එම කාරණයේ කිසිදු සත්යතාවක් නැහැ. මෙරට බුද්ධි අංශ මඟින් ලබා දෙන තොරතුරු නිවැරදියි. ඔහු සිටින ස්ථානය අප දන්නවා. කංජිපානි ඉම්රාන්ව විදෙස් රටකදී අත්අඩංගුවට ගැනීමක් මෙතෙක් වාර්තා වෙලා නැහැ”යනුවෙන් පවසා සිටියේ ය.
