Shani Abeysekera – රහස් පොලිසියේ හිටපු අධ්‍යක්ෂ ශානි අබේසේකර රිය අනතුරක් කර මරා දැමීමට කුමන්ත්‍රණය කළේය යන සිද්ධියක් සම්බන්ධයෙන් ආරක්ෂක ලේකම් ජනරාල් කමල් ගුණරත්න, ජාතික පොලිස් කොමිසමට සහ පොලිස්පති දේශබන්දු තෙන්නකෝන් යන අයට අධිකරණයට කරුණු පැහැදිලි කරන ලෙස නියම කරමින් ශ්‍රේෂ්ඨාධිකරණය මඟින් නොතීසි නිකුත් කර තිබේ. එලෙස නොතීසි නිකුත් කර ඇත්තේ ශානි අබේසේකරගේ ජීවිතය අනතුරේ බව පවසමින් ඔහු ඉදිරිපත් කළ පෙත්සමක කරුණු සලකා බැලීමෙන් අනතුරුවය.
පෙත්සම කැඳවූ අවස්ථාවේදී පෙත්සම්කරු වෙනුවෙන් පෙනී සිටි ජනාධිපති නීතිඥ උපුල් ජයසූරිය කරුණු දක්වමින් කියා සිටියේ, “රිය අනතුරක් කර තම සේවාදායකයා මරා දැමීමේ කුමන්ත්‍රණයක්” ඇති බවත්, ඒ අනුව කුමන මොහොතක හෝ මෙම අපරාධය කිරීමේ හැකියාව ඇති තත්වයක් යටතේ තම සේවාදායකයාගේ ජීවිතය අනතුරේ පවතින බවය. ශානි අබේසේකරට ලබාදී ඇති ආරක්ෂාව ප්‍රමාණවත් නොවන බව පෙන්වා දුන් නීතිඥවරයා, එම ආරක්ෂාව වැඩිකර ඔහුගේ ජීවිතය බේරාගැනීමට පියවර ගන්නැයි අධිකරණයෙන් ඉල්ලා සිටියේය.
ශ්‍රේෂ්ඨාධිකරණ විනිසුරුවරුන් වන විජිත් මලල්ගොඩ, මුර්දු ප්‍රනාන්දු සහ යසන්ත කෝදාගොඩ යන අයගෙන් සැදුම්ලත් විනිසුරු මඩුල්ලක් හමුවේ පෙත්සම සලකා බැලීමෙන් අනතුරුව, ලබන 09 වැනිදා අධිකරණයේ පෙනී සිට කරුණු දැක්වීමට වගඋත්තරකරුවන්ට නියම කරමින් නොතීසි නිකුත් කළ ශ්‍රේෂ්ඨාධිකරණය, අදාළ නොතීසි වග උත්තරකරුවන්ට බාරදීමට පෙත්සම්කාර ශානි අබේසේකරට නියම කළේය.
