රුසියාව තුළ පුටින් විරෝධී රහසිගත මෙහෙයුම් : යුක්රේන බුද්ධි අංශයට සහාය දෙන රුසියානුවන්
රුසියාව තුළ සිටිමින් ජනාධිපති ව්ලැඩිමීර් පුටින්ගේ පාලනයට එරෙහිව ක්‍රියා කරන බව කියන රුසියානු ජාතිකයන් දෙදෙනෙකු පිළිබඳව බීබීසී ලෝක සේවය විශේෂ ගවේෂණාත්මක වාර්තාවක් ඉදිරිපත් කර තිබේ. ඔවුන් යුක්රේනයේ හමුදා බුද්ධි අංශය වන GUR සමඟ රහසිගතව කටයුතු කරන බව පවසන අතර, රුසියානු හමුදා ඉලක්ක පිළිබඳ තොරතුරු රැස් කිරීම සහ ඩ්‍රෝන් ප්‍රහාර සඳහා සහාය ලබාදීම තම කාර්යයන් අතර වූ බව කියා සිටිති.
බීබීසීය විසින් ‘අයිවන්’ ලෙස හඳුන්වන පුද්ගලයා පවසන්නේ, රුසියාවේ හමුදා ගුවන් තොටුපළ සහ යුද උපකරණ නිෂ්පාදන මධ්‍යස්ථාන පිළිබඳ තොරතුරු රැස් කිරීම ඇතුළු මෙහෙයුම්වලට තමන් සම්බන්ධ වූ බවයි. ඩ්‍රෝන් ප්‍රහාර සඳහා අවශ්‍ය සැපයුම් කටයුතු සම්බන්ධයෙන් ද සහාය ලබාදුන් බව ඔහු සඳහන් කරයි. එවැනි ක්‍රියාකාරකම් හෙළි වුවහොත් දීර්ඝ කාලයක් සිරගත වීමේ අවදානමක් පවතින බව ද ඔහු පිළිගෙන තිබේ.
‘ෆෝමා’ ලෙස හඳුන්වන අනෙක් පුද්ගලයා පෝලන්තයේ පිටුවහල් ජීවිතයක් ගත කරන අතර, රුසියාව තුළ ස්වේච්ඡා ක්‍රියාකාරීන්ගේ ජාලයක් මෙහෙයවන බව පවසයි. එම ජාලය රුසියානු හමුදා නිලධාරීන් සහ වෙනත් ඉලක්ක පිළිබඳ තොරතුරු රැස්කර යුක්රේන බුද්ධි අංශයට ලබාදෙන බව ඔහු සඳහන් කරයි. තම ජාලය කිසිදු ඝාතනයකට සම්බන්ධ නොවන බව ඔහු අවධාරණය කළ ද, 2025 දෙසැම්බරයේදී ඝාතනයට ලක්වූ රුසියානු ලුතිනන් ජෙනරාල් ෆනිල් සර්වරොව් පිළිබඳ තොරතුරු යුක්රේන පාර්ශ්වයට ලබාදුන් බව පිළිගෙන තිබේ.
ෆෝමාට අනුව, යුක්රේනය වෙනුවෙන් රුසියාව තුළ ක්‍රියාකරන පුද්ගලයන් සංඛ්‍යාව 300ත් 500ත් අතර විය හැකිය. කෙසේ වෙතත්, එම සංඛ්‍යාව තහවුරු කළ නොහැකි බව බීබීසීය පෙන්වා දෙයි. රුසියාවේ යෙලබුගා ප්‍රදේශයේ ඩ්‍රෝන් නිෂ්පාදන මධ්‍යස්ථානයකට එල්ල වූ ප්‍රහාරයක් සම්බන්ධයෙන් ද අයිවන්ගේ භූමිකාව පිළිබඳ සැක මතුවී ඇති නමුත්, ඔහුගේ නිශ්චිත දායකත්වය ස්වාධීනව තහවුරු වී නොමැත.
