ICC Under 19 World Cup තරගාවලියේ ශ්‍රී ලංකා 19 න් පහළ කණ්ඩායම සහ සිම්බාබ්වේ 19 න් පහළ කණ්ඩායම අතර දකුණු අප්‍රිකාවේ කිම්බර්ලි හිදී ඊයේ (21) පැවැති තරගයෙන් ලකුණු 39 ක ජයක් වාර්තා කිරීමට ශ්‍රී ලංකා වයස 19 න් පහළ කණ්ඩායම සමත් විය. ඒ ඩක්වත් ලුවිස් න්‍යායට අනුවයි.
පළමුවෙන් පන්දුවට පහරදුන් ශ්‍රී ලංකා කණ්ඩායම ඕවර 48.3 ක් අවසානයේ සියලු දෙනා දැවී ලකුණු 204 ක් ලබාගත්තා. පන්දුවට පහරදීමේදී දිනුර කළුපහණ පන්දු 55 කදී හයේ පහර 2 ක් සහ හතරේ පහර 6 ක් සමග ලකුණු 60 ක් ලබාගත්තා. ලකුණු 88 කට කඩුලු 5 ක් බිඳවැටී තිබියදී 6 වැනි කඩුල්ල වෙනුවෙන් ශාරුජන් ශන්මුගනාදන් සමග එක්ව පන්දු 72 කදී ලකුණු 80 ක අගනා සම්බන්ධතාවක් ගොඩනැගීමටද දිනුර සමත් විය. පන්දු 40 කට මුහුණ දෙමින් නොදැවී ලකුණු 41 ක් ලබාගත් ශන්මුගනාදන්ගේ ඉනිමට හතරේ පහර 3 ක් ඇතුළත්.
පිළිතුරු ඉනිම ක්‍රීඩා කල සිම්බාබ්වේ යොවුන් කණ්ඩායම ජයග්‍රහණය සඳහා ලකුණු 205 ක ඉලක්කයක් හඹාගිය අතර ඕවර 13.2 ක් අවසානයේ වර්ෂාව හේතුවෙන් තරගය නතර කරන විට කඩුලු 3 ක් දැවී ලකුණු 30 ක් ලබා සිටියේය. ඩක්වත් ලුවිස් න්‍යායට අනුව නැවත තරගය ආරම්භ වන අවස්තාවේ සිම්බාබ්වේ පිලට ඕවර 24 කදී ලකුණු 129 ක් ලබාගැනීමට තිබු අතර, ඕවර 21.1 ක් අවසානයේ ඔවුන් සියලු දෙනා දැවී ලබාගත හැකි වූයේ ලකුණු 89 ක් පමණයි.
ශ්‍රී ලංකා යොවුන් කණ්ඩායමේ දක්ෂ පන්දු යැවීමක නිරත වූ මල්ෂ තරුපති ඕවර 4 ක් යවා ලකුණු 17 කට කඩුලු 4 ක් බිඳහෙළමින් ශ්‍රී ලංකා කණ්ඩායම ජයග්‍රහණය කරා රැගෙන ගියා. රුවිෂාන් පෙරේරා සහ විෂ්ව කඩුලු 2 බැගින් දවාගත්තා.
