Songs of Paradise – අපි කාටත් අපේම හීන තිබෙනව. මේ හීන කරා යන මාවතේ දි අනිවාර්යයෙන්ම මුණගැහෙන දෙයක් තමයි බාධක. අභියෝග, බාධක ආවම ගොඩක් දෙනා අධෛර්යමත් වෙනව. තමන්ගෙ හීන සැබෑ කරගැනීම අතරමග නතර කරලා දානව. මේ කතාව සමාජ සම්මතයන්, නීති, රීති කිසිවක් නොසළකා තමන්ගෙ හීන සැබෑ කරගත් ගැහැණියක් ගැන. ඇය කාශ්මීරයේ පළමු ගායිකාව රාජ් බෙගම්. ඇයව හඳුන්වන්නේ Nightingale of Kashmir යන නමින්. Songs Of Paradise ඇගේ ජීවිත කතාව ඇසුරෙන් නිමවුණ චිත්රපටයක්.
එවකට (1950) සේබා තරුණ ගැහැණු ළමයෙක්. කාශ්මීරයේ අතිශය සම්ප්රදායික ගම්මානයක උපත ලැබූ ඇය මවත් පියාත් සමග ජීවත්වුණා. ඇගේ පියා ඇඳුම් මසන්නෙක්. මවට අවශ්ය වුණේ දුවට ඉක්මනින්ම විවාහයක් කර දෙන්න. ඒත් සේබට ඕනෙ වුණේ සිංදු කියන්න. නයිටිංගේල් කුරුල්ලෙක් තරම් ලස්සන හඬක් ඇය සතුවුණා. ඒක පුරුෂ ආධිපත්යය දැරූ සමාජයක්. ඇත්තටම ඒ ප්රදේශයේ උරුමක්කාරයන් පිරිමින්. ගැහැණු හිටියෙ ගෙවල් ඇතුළෙ සැඟවිලා. එහෙම තැනක ඉඳගෙන සේබා සංගීතය ඉගෙන ගත්තා. පන්ති කාමරයෙ ගැහැණු ළමයෙක්ට හිටියෙ ඇය විතරයි. තරඟයකින් ජයග්රහණය කරලා ගුවන් විදුලියේ ගායනා කරන්න ගියාම එතැන හිටියෙත් පිරිමි විතරයි. ඔවුන් ඈ දිහා බැලුවෙ අප්රසාදයකින්. ඒත් සේබා බොහොම දක්ෂ කෙනෙක් බව ඒ හැමෝම ඉක්මනින්ම වටහා ගත්තා.
ගුවන් විදුලියේ ඇගේ ගීත රට පුරා ඇහුනත්, ඇගේ ප්රදේශයේ අය ඈ දිහා බැලුවෙ හොඳ විදිහකට නෙමේ. ඔවුන්ට නින්දා කළ එකියක් දිහා බලන අයුරිනුයි ඔවුන් ඈ දිහා බැලුවෙ. ඒ විතරක් නෙමේ සිද්ධකළ “අවමානයට” සේබ ගෙ දෙමව්පියන්ටත් හිරිහැර විඳින්න සිද්ධ වුණා. ඒත් ඇය ඇගේ හීනවලට මියැදෙන්න ඉඩක් දුන්නෙ නැහැ.
සමාජය වෙනස්වීම්වලට හරි බයයි. ඒ ඇතුළෙ ඉඳගෙන වෙනස් වෙන්න, හීනවලට යන්න උත්සාහ කරන අයටත් ඔවුන් බයයි. ඒ නිසාම ඔවුන් එවැනි අයෙක් දුටු වහාම කෙනෙහිලිකම්, නින්දා, අපහාස කිරීම අරඹනවා. නමුත් ඒ කිසිවක් මායිම් නොකර හීන කරා යන උදවිය කවදා හෝ තමන්ගෙ හීනයට යනවා. එදාට ඔවුන්ට ලෝකයේම ආදරය ලැබෙනවා. සිදුකළ වෙනස ආදරයෙන් වැළඳගන්න කැමති දහසක් දෙනා ඔවුන් හා එක් වෙනවා. ලෝකය වෙනස් කරන්නෙ තමන්ගෙ හීන විශ්වාස කෙරුව මිනිස්සු !
