Katrina Kaif බ්‍රිතාන්‍යයේ සිට බොලිවුඩ් සිනමාව වෙත පිවිසි බොලිවුඩයේ සාර්ථකම රංගන ශිල්පිනියන්ගෙන් කෙනෙකු ලෙස හැඳින්වෙනවා. සුප්‍රකට Reebok සමාගමේ සන්නාම තානාපතිනිය වන ඇය, කලක් සල්මන් ඛාන්ගේ පෙම්වතිය බවට බොලිවුඩය තුළ උණුසුම් පුවත් මවනු ලැබුවා. මේ ඇය සමගින් MW සිදුකළ කතාබහක්.
• ඔබ පෞද්ගලිකත්වයට ගොඩක් කැමතියි වගේ?
මම දේවල් දකින්නේ මගේම ක්‍රමයකට. අනිත් අයට මාව පෙනෙන විදිහ ගැන මං එච්චර හිතන්නෙ නැහැ. මම මට අවංක වෙමින් ජීවත්වෙනවා. හරියි කියලා මට හිතෙන දේ කරනවා. මම ක්ෂේත්‍රයට ඇවිත් අවුරුදු ගණනාවක් ගෙවී ගිහින්. ප්‍රේක්ෂකයන් මා සමග සිටියා. එය ශක්තියක්. පුදුමාකාර හැඟීමක්.
• ඔබ චිත්‍රපට තෝරාගන්නෙ කොහොමද?
අලුත් දෙයක් ඉගෙනගන්න පුලුවන් කතාවකට මම කැමතියි. මාව දියුණු කරන දෙයක්. ශක්තිමත්,සිත් ගන්නා සුළු චරිතවලට මම කැමතියි. එය අපූරු අත්දැකීමක්.
• ක්ෂේත්‍රය තුළ ඔබව හැඳින්වෙන්නේ සාර්ථක නිළියක් වශයෙන්. මේ ඇගයීම නිසා ඔබට ප්‍රධාන චරිත ලැබෙනවා කියලා මං කිව්වොත්..?
“තරු” සහ නළු නිළියන් අතර වෙනස තේරුම් ගන්න මම උත්සාහ කරනවා. මම හොඳම දේ තෝරාගන්නවා. චරිතයක් තුළින් අනවශ්‍ය ප්‍රතිරූපයක් ඉස්මතු කරන්න මම උත්සාහ කරන්නෙ නැහැ. මම උත්සාහ කරන්නේ ඇත්ත නිරූපනය කරන්න. සාර්ථක අසාර්ථක බව තීරණය කරන්න පුලුවන් ප්‍රේක්ෂකයන්ටම පමණයි.
• චිත්‍රපටයක වැඩකටයුතු ඔබ බලාපොරොත්තු නොවන අයුරින් සිදුවෙන විට ඔබ මොකද කරන්නෙ ?
මම මට තෘප්තිමත් වෙන්න පුලුවන් අයුරෙන් මගේ වැඩ ටික කරනවා. මම නිරතුරුවම අනපේක්ෂිත අවස්ථාවන්ට සූදානම්ව සිටිනවා.
• මීට වඩා දෙයක් කරන්න තිබුණා කියලා සිතුන දේවල් ඔබේ සිනමා ගමන හෝ ජීවිතය තුළ තිබුණාද?
සත්තකින්ම. අපි කවුරුත්ම 100% ක් නිවැරදි නැහැ. අපිට පුලුවන් නැවත උත්සාහ කරන්න. අපේ උපරිමය වෙනුවෙන්.
• ඔබ වැඩ කරන්න කැමති අය ඉන්නවද?
ගොඩක් ඉන්නවා. ඒ අතර අළුත් අධ්‍යක්ෂකවරුත් ඉන්නවා. රාජු හිරානි, ආදිත්‍ය චොප්රා, සංජේ ලීලා බන්සාලි ට මම කැමතියි. ඔවුන් විශිෂ්ඨ අධ්‍යක්ෂකවරුන්. සෝයා අක්තාර් සමග ආයෙම වැඩ කරන්න මම කැමතියි.
• ඔබ බොලිවුඩය තුළ නමක් දිනූ නිළියක්. ඉතිං නවක අධ්‍යක්ෂකවරුන් සමග වැඩ කිරීම අවදානම් නැද්ද?
නැහැ. සෑම විශාල සිනමාකරුවෙක්ම බිහිවුනේ කුඩා ඇරඹුමකින්.
• බොලිවුඩයේ ලිංගිකත්වය ඕනෑ තරම් තියෙනවා නේද?
නැහැ. ඔබ එහෙම තිබෙනවා කියලා හිතනවනං බොලිවුඩ්වල ලිංගිකත්වය තියෙනවා. ඔබ එය එහෙම නැහැ කියලා විශ්වාස කරනවනං එහෙම නැහැ. ඔබට කරන්න ඕන දේ ඔබ දන්නවනං,ඔබේ ජීවිතය,රැකියාව පිළිබඳව දැක්මක් ඔබ සතුයි නං ඔය ප්‍රශ්නය අදාළ වෙන්නේ නැහැ.
• ඔබේ අනාගත බලාපොරොත්තු?
මම දන්නෙ නැහැ. හොඳ නිර්මාණවල කොටසක් වෙන්න කැමතියි. මගේම නිෂ්පාදන සමාගමක් යටතේ චිත්‍රපටයක් හදන්න කැමතියි.
