The Court of Appeal – ගල්කිස්ස මහේස්ත්රාත් අධිකරණය විසින් දුන් ඇප නියෝගයක් විවේචනය කිරීම තුළින් අධිකරණයට අපහාස කළේ යැයි හිටපු පාර්ලිමේන්තු මන්ත්රීනි හිරුණිකා ප්රේමචන්ද්රට එරෙහිව ඉදිරිපත් කර තිබෙන පැමිණිල්ලට අදාළ විරෝධතා ගොනු කිරීම සඳහා සති දෙකක කාලයක් ලබාදුන් අභියාචනාධිකරණය එම පැමිණිල්ල යළි ජුනි මස 14 වන දා කැඳවන ලෙස අද [මැයි 08] නියෝග කළේය. ඌව පළාත් ආණ්ඩුකාර මොහොමඩ් මුසම්මිල්ගේ පුත්රයා වූ හාඩි ජමාල්ඩීන් විසින් ඉදිරිපත් කළ පැමිණිල්ලක් අද සලකා බැලීමෙන් අනතුරුව අභියාචනාධිකරණයේ සභාපති විනිසුරු නිශ්ශංක බන්ධුල කරුණාරත්න සහ ශෂී මහේන්ද්රන් යන අයගෙන් සමන්විත විනිසුරු මඩුල්ලක් විසින් මෙම නියෝගය නිකුත් කරනු ලැබ තිබේ.
පැමිණිල්ලිකාර පාර්ශවය වෙනුවෙන් පෙනී සිටි නීතිඥ නිශාන් ප්රේමතිරත්න අධිකරණය හමුවේ කරුණු දක්වමින් කාන්තා දිනය නිමිත්තෙන් පැවති ප්රවෘත්ති සාකච්ඡාවකදී යම් සිද්ධියකට අදාලව මෙම නඩුකරයේ පැමිණිලිකරු ඇපමත මුදා හැරීමට ගල්කිස්ස මහේස්ත්රාත් අධිකරණය විසින් දුන් නියෝගය විවේචනය කරමින් වග උත්තරකාරිය විසින් අදහස් පල කර ඇතැයි චෝදනා කළේය. මෙහිදී විනිසුරු මඩුල්ලේ සාමාජික විනිසුරු ශෂී මහේන්ද්රන් පැමිණිකාර පාර්ශවයේ නීතිඥවරයාගෙන් විමසා සිටියේ වග උත්තරකාරිය විසින් සිදු කළ ප්රකාශය තුළින් අධිකරණයට අපහාසයක් වී තිබෙන්නේ කෙසේදැයි යන්නය. වග උත්තරකාරිය ඇයගේ ප්රකාශයේ යම්කිසි අධිකරණයක් හෝ කිසියම් නඩුවක අංකයක් හෝ සඳහන් කර නොමැති බව පෙන්වා දුන් විනිසුරුවරයා එසේ තිබියදී අධිකරණයට අපහාස කිරීමේ චෝදනා ඉදිරිපත් කරන්නේ කෙසේදැයි විමසා සිටියේය.
උත්තරකාර හිරුණිකා ප්රේමචන්ද්ර වෙනුවෙන් පෙනී සිටි ජනාධිපති නීතිඥ ෆර්මාන් කාසිම් අධිකරණය හමුවේ කරුණු දක්වමින් මෙම නඩුකරයට අදාලව විත්තිකාරියට එරෙහිව දඩුවම් නොකිරීමට හේතු ඉදිරිපත් කරන ලෙස ඉල්ලා ගොනු කරන චෝදනා පත්රය සම්බන්ධයෙන් විරෝධතා ගොනු කිරීමට අවසර ලබා දෙන ලෙස ඉල්ලා සිටියේය. එම ඉල්ලීමට අවසර දුන් අධිකරණය විරෝධතා තිබේනම් ඒවා සති දෙකක් තුළ ගොනු කිරීමට නියෝග කළ අතර පැමිණිල්ල නැවත ජුනි මස 14 වනදා කැඳවන ලෙසත් නියම කළේය.
