Sri Lanka: නවසීලන්තය සමග පැවැත්වෙන පළමු ටෙස්ට් තරගයේ ආරම්භක දිනය නිමා වන විට කඩුලු 6 කට ලකුණු 305ක් රැස්කරමින් සංචාරක ශ්රී ලංකා කණ්ඩායම දිනයේ වැඩි ගෞරව දිනා ගැනීමට සමත් වුණා.
හැග්ලි ඕවල් හිදී කාසිය වාසිය දිනූ ටිම් සවුතිගේ ආරාධනයෙන් පළමුව පන්දුවට පහර දීමට පැමිණි ශ්රී ලංකා පිලේ මුල්පෙළ පිතිකරුවන් විශේෂයෙන් කුසල් මෙන්ඩිස් සිත් ඇදගන්නාසුළු ආරම්භයක් ලබා දුන්නා.
කෙසේ වෙතත් කඩුලු 5ක් දවාගත් ටිම් සවුති සහ මැට් හෙන්රිගේ නොපසුබස්නා උත්සාහය තරගයේ ජීවය රඳවා තබා ගත්තා.
අයහපත් ආලෝක තත්ත්වය හේතුවෙන් පළමු දිනයේ තරගය නතර කරන විට ධනංජය ද සිල්වා නොදැවී ලකුණු 39ක් ලබාගෙන සිටි අතර, ඔහු සමඟින් කසුන් රාජිත ලකුණු 16ක් ලබාගෙන කඩුල්ලේ රැඳී සිටියා.
ශ්රී ලංකා ඉනිමට වේගවත් ආරම්භයක් ලබා ගත් කුසල් මෙන්ඩිස් ලකුණු 87ක් ලබා ගත් අතර ඊට හතරේ පහර 16ක් ඇතුළත් වුණා.
ඔහු සමග දෙවන කඩුල්ලට ලකුණු 135ක සබඳතාවක් ගොඩනැඟූ දිමුත් කරුණාරත්න ලකුණු 50කට දැවී ගියා.
මැද පෙළ සවිමත් කළ ඇන්ජලෝ මැතිව්ස් ලකුණු 47ක් සහ දිනේෂ් චන්දිමාල් ලකුණු 39ක් ලබා ගත්තා.
සිය ටෙස්ට් දිවියේ ලකුණු 7000 සීමාව පසුකර ගිය මැතිව්ස් එම දස්කම කළ තුන්වන ශ්රී ලංකා පිතිකරුවා බවට පත් වුණා.
