Court Order – හෝටල් හිමියකු ඇතුළු එහි සේවකයන් පස් දෙනකු පැහැරගෙන ගොස් වධ බන්ධනයන්ට ලක් කිරීමේ චෝදනාවන්ට වරදකරුවන් වු තිස්සමහාරාම පොලිසයේ හිටපු ස්ථානාධිපතිවරයා ඇතුළු පෙලිස් නිලධාරීන් තිදෙනකුට මාතර මහාධිකරණ විනිසුරු චාමර තෙන්නකෝන් විසින් වසර හත බැගින් වූ බරපතල වැඩ සහිත සිරදඬුවම් නියම නියම කර තිබේ. එමෙන්ම හිංසනයට ලක්වූ පුද්ගලයන් පස්දෙනාට රුපිල් ලක්‍ෂ පහ බැගින් වූ වන්දිද, විත්තිකරුවන්ට රුපියල් දස දහස බැගින් වූ දඩ මුදල්ද ගෙවීමට නියම කළේය.
මෙලෙස දඬුවම් නියම වුයේ තිස්සමහාරාම පොලිසියේ ස්ථානාධිපතිවරයා වශයෙන් කටයුතු කළ දැනට කොස්ගොඩ පොලිසියේ ස්ථානාධිපතිවරයා වශයෙන් කටයුතු කරන ප්‍රභාත් දේශබන්ධු, තිස්සමහාරාම පොලිසියේ උප පොලිස් පරීක්‍ෂවරයකු වශයෙන් කටයුතු කළ දැනට වැල්ලවත්ත පොලිසියේ උප පොලිස් පරීක්‍ෂවරයකු වශයෙන් කටයුතු කරන සන්නස්ගල සහ තිස්සමහාරාම පොලිසියේ සැරයන්වරයකු වශයෙන් කටයුතු කර මේ වන විට වැඩ තහනමකට ලක්ව සිටින කුලතුංග නමැත්තාය. පැහැරගෙන් ගොස් හිංසනයට ලක් කොට ඇතැයි නඩු විභාගයේදී අනාවරණය වී ඇත්තේ තිස්සමහාරාම ප්‍රදේශයේ ‘තිස්ස විලේජ්’ නමැති හෝටලයේ හිමිකරු වන උදය ශාන්ත දිසානායක එහි සේවකයන් වශයෙන් කටයුතු කළ සමන්ත, අජන්ත, රුවන් සහ සුජීව දිසානායක නමැත්තන්ය.
‘තිස්ස විලේජ්’ නමැති හෝටලය සම්බන්ධයෙන් එම හෝටලයේ හිමිකරු සහ තවත් පාර්ශවයක් අතර ඇති වු ආරවුලක් හේතූවෙන් විත්තිකාර පොලිස් නිලධාරීන් හෝටලයේ හිමිකරු සහ එහි සේවකයන් පැහැරගෙන ගොස් ඔවුන් රඳවාගෙන කෲර ලෙස හිංසනයට පත් කර ඇති බවත් පසුව ගිනි අවි, බෝම්බ ලඟ තබාගත් බවට චෝදනා කරමින් ඔවුන් අධිකරණයට ඉදිරිපත් කරමින් රිමාන්ඩ් බාරයට පත් කර ඇති බවත් නඩු විභාගයේදී අනාවරණය විය. 2003 වසරේ සිට වසර 19ක කාලයක් පුරා පැවැති දීර්ඝ නඩු විභාගයකින් පසුව විත්තිකරුවන්ට එරෙහි චෝදනා පැමිණිල්ල විසින් සාධාරණ සැකයකින් තොරව ඔප්පු කර ඇතැයි තීන්දු කළ විනිසුරුවරයා චෝදනාවන්ට විත්තිකරුවන් වරදකරුවන් බව තීරණය කළේය.
