බැඳීම් මුදල්වලට වඩා හරි ඉහළයි 3BHK
පවුල කියන්නෙ සමාජයේ කුඩාම ඒකකය. පිටත සමාජයට නිරාවරණය වීමට කලින් කෙනෙකුගේ ජීවන දැක්ම, පෞරුෂය තීරණය කරන ප්රධානම සාධකය එයයි. අපි සතු බොහෝ දේත් ඒ දේවල් ගොඩනගා ගැනීමට දායක වෙන්නේත් පවුලයි. පවුල ඇතුලෙ අපි කුඩා කණ්ඩායමක් විදිහට උත්සාහයෙන්, කැපකිරීම් කරමින්, ආදරය බෙදා හදාගනිමින් එක්ව අරමුණු කරා ගමන් කරනවා. ඒ ගමනෙදි බාධා, අභියෝග, බලාපොරොත්තු සුන්වීම් අනන්තවත් මුණගැහෙන්න පුළුවන්.
මධ්යම පාන්තික පවුලකට තියෙන අනේකවිධ හීන අතරෙන් ප්රධානම එකක් තමයි නිවසක් කියන්නෙ. නමුත් ජීවන අරගලය, ආර්ථික ගැටළු, අධ්යාපනය ලබන ළමුන්ගේ වියහියදම් වගේ දේවල් එක්ක සැබැවින්ම මේක හැබෑ කර ගන්න අසීරු හීනයක්. සමහරවිට ඒ වෙනුවෙන් විශාල කැප කිරීමක් කරන්න සිද්ධවෙනවා. ගොඩක් පවුල්වල ඇත්ත කතාව එයයි.
මේ කතාවත් එවැනිම පවුලක් ගැන. වාසුදේවන් ඔහුගෙ බිරිඳ සහ දරුවන් දෙදෙනා එක්ක ජීවත්වුණේ කුලී නිවසක. තැනින් තැන නිවාසවලට මාරුවෙමින් ජීවත්වීම ඔවුන්ගෙ ජීවිතයේ පුරුද්දක් බවට පත්වෙලා තිබුණා. පවුලෙ හැමෝගෙම හීනය වුණේ තමන්ගෙම කියලා නිවසක ජීවත්වෙන එක. නමුත් ආර්ථික ගැටළු එක්ක ඒක හීනයක්ම වෙමින් තිබුණා. වාසුදේවන් බොහොම අරපරිස්සමින් මුදල් ඉතුරු කරගත්තා. බිරිඳ ශාන්ති කෑම හදලා විකුණුවා. පුතා සහ දුවත් ඉගෙන ගන්න අතරෙම පවුල වෙනුවෙන් තමන්ට කරන්න පුළුවන් දේවල් කරා. දරුවන්ගෙ අධ්යාපන කටයුතු, විභාග යනාදිය වෙනුවෙන් ලොකු මුදලක් වැය වුණා. පවුලක් ඇතුළෙ කරන්න සිද්ධවෙන යුතුකම් සහ වගකීම් බොහොමයි. කාලය ගෙවුණෙ දරුවො ලොකු මහත් වෙමින්, දෙමාපියන් වියපත් වෙමින්. ඒත් මොනතරම් උත්සාහ කළත් ගෙයක් ගැන ඔවුන්ගෙ හීනයට විවිධ බාධා ඇතිවුණා. ඒ තමයි මධ්යම පාන්තික ජීවිත අරගලයේ ස්වභාවය.
පවුලක් විදිහට මුහුණදෙන්න සිද්ධවෙන අභියෝග බොහොමයි. සමහරවිට අපි කාලයක් තිස්සෙ බොහොම දුක් මහන්සියෙන් ඉතිරි කෙරුව මිල මුදල් එක් ක්ෂණයකින් නැති වෙලා යන්න පුළුවන්. බලාපොරොත්තු නොවූ සිදුවීම්, ලෙඩ රෝග වගේ දේවල්වලට මුහුණ දෙන්න සිද්ධවෙනවා වෙන්නට පුළුවන්. ඒ කොහොම වුණත් පවුලක සාමාජිකයො කියන්නෙ එකම හද ගැස්මක් තියෙන, එකම හදවතකින් හුස්ම ගන්න පිරිසකට. අපි ජීවත්වෙන්නෙ මොනතරම් ආර්ථික ගැටළු එක්ක වුණත් සමහරවෙලාවට ආදරණීය බැඳීම් ඇතුළෙ මුදල්වලට කරන්න පුළුවන් දෙයක් නැහැ, බැඳීම් මුදල්වලට වඩා හරි ඉහළයි. දෙමව්පියන්ගෙ, දරුවන්ගෙ හදවත්වල එකිනෙකා කෙරෙහි තියෙන ආදරේ කවමදාවත් මිල කරන්න බැහැ.
එකමුතුකමෙන්, සහයෝගයෙන්, ඉවසිය යුතු තැන්වල ඉවසා දරා ගනිමින්, කැප කිරීම් කරන්න ඕනෙ තැන්වල ආදරණීයයන් වෙනුවෙන් අසීමිතව කැප කිරීම් කරමින් පවුලක් විදිහට ජීවත් වුණාම හීන කියන්නෙ මහ ලොකු දේවල් නෙමේ. ආදරේට පුළුවන් හීන හැබෑ කරන්න. මෙලොව අපි සතු වටිනාම සම්පත තමයි අපේ ආදරණීයයන්. අපිට වැඩිපුරම ආදරේ කරන්නෙත්, අපි ගැන වදවෙන්නෙත්, කැප කිරීම් කරන්නෙත් ඔවුන් විසින්. දෙමාපිය දූ දරු බැඳීම තරම් ආදරණීයම ලස්සන බැඳීමක් මේ ලෝකෙ වෙන නැහැ.
