John Abraham : ඔහු, බොලිවුඩ් ක්‍රියාදාම චිත්‍රපට සඳහා නැතිවම බැරි රංගන ශිල්පියෙක්.අසීමිත කාන්තා ආකර්ෂණයකට උරුමකම් කියන ඔහු කඩවසම්බවේ අපූර්වතම සංකේතයක්. මේ John Abraham සමගින් ( Man’s World India සඟරාව) සිදුකළ කතාබහක්.
• ඔබගේ වර්තමානය ගැන ඔබට සිතෙන්නේ මොනවද?
මම මේ මොහොත ගැන තෘප්තිමත්. භෞතික වශයෙන් මගේ ඉලක්කය නිරෝගී සිරුරක් පවත්වාගැනීම.
• කාන්තාවන් සම්බන්ධව හැම පිරිමියෙක් ම දැනගත යුතුම දේ මොකක්ද?
හැමවිටම ඔබ ඔබේ සීමාවේ සිටින්න. ඔවුන්ට බාධා කරන්න යන්න එපා.
• ඔබේ ලොකුම දුර්වලකම මොකක්ද?
දුර්වලකම් ගොඩක් තියෙනවා. මට හිතෙන්නෙ මං අනිත් අයත් එක්ක සන්නිවේදනය කරනවා, සබඳකම් තියාගන්නවා මදියි.
• ඔබ නිතරම භාවිතා කරන වචනය?
ඇත්තෙන්ම සහ ඔව්. මම කැමතියි “නැහැ” කියලා කියන්නත් ඉගෙනගන්න.
• ඔබට අවස්ථාවක් ලැබුනොත් වෙනත් අයෙක් වෙන්න,ඔබ කැමති කවුරු බවට පත්වෙන්න ද?
මම ජෝන් ඒබ්‍රහම් වීම මට සතුටක්.
• හැම කෙනෙක්ටම තිබිය යුතු දෙයක් කියන්න.
යහපත් පුද්ගල සබඳතා.
• ඔබේ ජීවිතය වෙනස්කළ වටිනාම දේ මොකක්ද?
මගේ දෙමව්පියන්. ඔවුන් අවංකයි සහ අධ්‍යාපනයේ ඇති වැදගත්කම ගැන මට පහදාදුන්නෙත් ඔවුන්.
• ඔබ විසින්ම කඩකරන ඔබේම ප්‍රතිපත්ති මොනවද?
මම මගේ ප්‍රතිපත්ති කඩකරන්නේ නැහැ.
• ඔබට බයක් දැනෙන්නේ මොනව ගැනද?
මම මරණයට සහ අසාර්ථකවීමට බය නැහැ. සාර්ථකත්වය කරා ළඟාවීම පිළිබඳව මට දැනෙන්නේ බයක්.
• මිය යෑමට පෙර විඳින්න කැමති අත්දැකීමක් තියෙනවද?
මොහොතකට හෝ ශරීරයෙන් බැහැරවෙලා ඉන්න මම කැමතියි. (Out Of Body Experience)
• ජීවිතයේ ඔබ සොයමින් සිටින්නේ මොනවාද?
මට අවශ්‍ය නැති දේවල්.එය මාව අසතුටට පත් කරනවා. ඒක එච්චර හොඳ දෙයක් නෙමේ.
• පෘථිවියේ ඔබ කැමතිම තැන?
මම ආසයි කලබලකාරී නැති, දිග පාරක බයික් පදින්න. ඒ Pacific Coast Highway එක, හිමාලය හෝ ලෝකයේ ඕනෑම තැනක් වෙන්න පුළුවන්.
• ඔබව කෝපයට පත්කරන්නේ මොනවද?
මිනිස්සු මට බොරු කියන එක මට ඉවසන්න අමාරුයි.
• ඔබ ගැන හඳුන්වන්න.
මම සරල ජීවිතයක් ගතකරන සරල මනුෂ්‍යයෙක්.
• පරිපූර්ණ සතුට ගැන ඔබේ අදහස?
එය අදහසක් පමණයි.
• ඔබේ පරණම මතකය මොකක්ද?
මට වයස අවුරුද්දෙදි වගේ අපි ජීවත්වුනේ Bhandup ප්‍රදේශයේ. ළඟදි දවසක මම ඒ ගෙදර ඇඳ ළඟ ඉඳලා ඉස්සරහ දොර ගාවට වෙනකම් පිහිටීම මතක් කළා. මට ආසයි ඒ මතකය හරිද කියලා බලන්න.
• ඔබ සතු වටිනාම දේ?
මගේ පවුල. මම මගේ පවුලට තදින් බැඳුන කෙනෙක්. මම බයික්වලටත් කැමතියි.
