India’s prime minister- ඉන්දියානු අගමැති නරේන්ද්‍ර මෝදි තෙදින නිල සංචාරයක් සඳහා අද (04) දිවයිනට පැමිණෙනවා.
ඉන්දියානු අග්‍රාමාත්‍යවරයා පිළිගැනීමේ නිල උත්සවය අප්‍රේල් 05 වැනිදා පෙරවරුවේ කොළඹ නිදහස් චතුරස්‍ර පරිශ්‍රයේදී පැවැත්වෙන අතර, ඉන්පසුව ජනාධිපති ලේකම් කාර්යාලයේදී ඉන්දීය අගමැතිවරයා ශ්‍රී ලංකා ජනාධිපති අනුර කුමාර දිසානායක සමඟ ද්වි පාර්ශ්වික සාකච්ඡා පැවැත්වීමට නියමිතව තිබෙනවා.
ඉන්දීය අග්‍රාමාත්‍යවරයා විසින් සාම්පූර් සූර්ය බලාගාර ව්‍යාපෘතිය ආරම්භ කිරීම, ආගමික ස්ථාන කිහිපයක් සඳහා සූර්ය බල පද්ධති ලබාදීම සහ දඹුල්ල ශීතාගාරය විවෘත කිරීම ඇතුළු ව්‍යාපෘති කිහිපයක් ආරම්භ කිරීමට නියමිතයි.
එසේම, ඉන්දියානු අග්‍රාමාත්‍යවරයා අනුරාධපුර ශ්‍රී මහා බෝ සමිඳුන් වැඳ පුදා ගැනීමටත්, ඉන්දියානු රජයේ ප්‍රදානයක් ලෙස ස්ථාපිත කරන ලද මහව – අනුරාධපුර දුම්රිය සංඥා පද්ධතිය සහ නවීකරණය කරන ලද මහව – ඕමන්ත දුම්රිය මාර්ගය නිල වශයෙන් විවෘත කිරීමටත් සැලසුම් කර ඇති බවයි ජනාධිපති මාධ්‍ය අංශය වැඩිදුරටත් සඳහන් කළේ.
