India – පසුගිය ජුනි මාසයේදී පුද්ගලයින් 260 දෙනෙකුට මරු කැඳවමින් ඉන්දියාවේ අහ්මදාබාද්හි සිදුවූ බිහිසුණු ගුවන් අනතුර සම්බන්ධයෙන් වන මූලික වාර්තාව එළි දක්වා තිබෙනවා.
අනතුරට ප්රධාන හේතුව යානයේ ඉන්ධන පාලන ස්විච්චය ක්රියාවිරහිත කිරීම නිසා එන්ජින්වලට ඉන්ධන සැපයීම නතරවීම බවයි අදාල විමර්ශන වාර්තාවට අනුව පැවසෙන්නේ.
අදාළ පරීක්ෂණ වාර්තාවට අනුව, එන්ජින් දෙකෙහිම ඉන්ධන පාලන ස්විචයන් තත්පර 01ක කාල පරතරයකින් RUN සිට CUTOFF වෙත මාරු වී ඇති බවත්, නියමු කුටියේ පටිගත දත්ත අනුව ‘RUN සිට CUTOFF වෙත මාරුකළේ ඇයි’ දැයි එක් නියමුවෙකු අනෙක් ගුවන් නියමුවාගෙන් අසා ඇති බවත්, එහෙත් තමා එසේ නොකළ බව අනෙක් නියමුවා ඊට පිළිතුරු ලබාදී ඇති බවයි සඳහන් වන්නේ.
යානය අනතුරට ලක්වන අවස්ථාවේ යානයේ Pilot flying ලෙස නියමු Clive Kunder ද Pilot Monitoring ලෙස නියමු Sumeet Sabharwal ද සිට ඇති අතර පටිගත වූ අදාල දෙබස කවුරුන් විසින් කාහට කියන ලද්දැක් දැයි තවමත් පැහැදිලි වී නොමැති බවයි වාර්තා වන්නේ.
මෙම පාලන ස්විචය ස්වංක්රියව ක්රියා නොකරන අතර, එය ගුවන් නියමුවන් විසින් සිදුකළ යුතු කාර්යයක් බවද, එලෙස ඉන්ධන ස්විචය අක්රිය වන්නේ අතිශය දුර්ලභ අවස්ථාවකදී බවද ගුවන් විශ්ලේෂකයන් පවසනවා.
පසුගිය ජුනි 12 වැනිදා ලන්ඩන් බලා පිටත් වූ එයාර් ඉන්දියා ගුවන් සේවයට අයත් අනතුරට පත් යානය අහ්මදාබාද් ගුවන් තොටුපොළෙන් පිටත් වී සුළු මොහොතකට පසු වෛද්ය නේවාසිකාගාර ගොඩනැගිල්ලකට කඩා වැටී අනතුරට ලක්වූ අතර, ඒ හේතුවෙන් යානයේ සිටි එක් මගියෙකු හැර සෙසු සියලු දෙනාම ජීවිතක්ෂයට පත්වුණා.
