EPF – සේවක අර්ථසාධක අරමුදල් ගෙවීම් ඇතුළු දත්ත ලබා ගත හැකි ඩිජිටල් දත්ත පද්ධතියක් සකස් කිරීම සඳහා මහ බැංකුව සහ කම්කරු දෙපාර්තමේන්තුව ඒකාබද්ධව වහාම පියවර ගන්නා ලෙස රජයේ ගිණුම් පිළිබඳ පාර්ලිමේන්තු කාරක සභාව කම්කරු අමාත්‍යාංශයේ ලේකම්වරයාට උපදෙස් දී ඇතැයි වාර්තා වේ. කාරක සභාව මෙහිදී පෙන්වා දී ඇත්තේ නිරන්තර යාවත්කාලීන විය හැකි දත්ත පද්ධතියක් කම්කරු දෙපාර්තමේන්තුව සතු විය යුතු අතර එය ජනතාවගේ ආරක්ෂාව සඳහා අත්‍යවශ්‍ය කාරණයක් බවත් ය.
මෙම දැනුම් දීම සිදුව ඇත්තේ කම්කරු දෙපාර්තමේන්තුවේ 2021 සහ 2022 වසර වල විගණකාධිපති වාර්තා සහ වර්තමාන කාර්ය සාධනය විමසීම සඳහා රජයේ ගිණුම් පිළිබඳ පාර්ලිමේන්තු කාරක සභාව එහි සභාපති රාජ්‍ය අමාත්‍ය ලසන්ත අලගියවන්නගේ ප්‍රධානත්වයෙන් පාර්ලිමේන්තුවේදී රැස්වූ අවස්ථාවේදිය.
