Borella accident – (28) දින බොරැල්ල ප්‍රදේශයේ සිදුවූ මාරක රිය අනතුරට සම්බන්ධ දොඹකරයේ රියදුරු ලබන අගෝස්තු 07 වැනිදා දක්වා රක්ෂිත බන්ධනාගාර ගත කරන ලෙස කොළඹ රථවාහන මහෙස්ත්‍රාත් අධිකරණය නියෝග කර තිබෙනවා.
ඒ අනුව, එම සිද්ධියට සම්බන්ධ දොඹකරයේ හිමිකරු රුපියල් ලක්ෂ පහක ශරීර ඇපයක් මත මුදා හැරීමටත් එම අධිකරණය විසින් නියෝග කර ඇති බවයි සඳහන් වන්නේ.
නඩුව ඊයේ (ජූලි 29) කැඳවූ අවස්ථාවේදී සැකකරුවන් අධිකරණයට ඉදිරිපත් කරමින් කරුණු දැක්වූ බොරැල්ල පොලීසියේ නිලධාරීන්, ඊයේ පෙරවරු 8.45ට පමණ බොරැල්ල කනත්ත වටරවුම ආසන්නයේ සිදුවූ මෙම මාරක රිය අනතුර හේතුවෙන් එක් පුද්ගලයකු මියගොස් තවත් පුද්ගලයන් හත් දෙනකු බරපතළ තුවාල ලබා තිබෙන බව සඳහන් කර තිබෙනවා.
මෙම රථය පැදවූ සැකකාර රියදුරු ගංජා මත්ද්‍රව්‍ය පානය කර ඇති බවට කොළඹ සහකාර අධිකරණ වෛද්‍ය නිලධාරියා ඉදිරිපත් කළ වාර්තාවක සඳහන්ව තිබෙන බවත්, මෙම රථයේ එන්ජිම පණ ගන්වන ස්විචය පමණක් ක්‍රියාත්මකව පැවති බවත්, එන්ජිම අක්‍රීය කරන ස්විචය ක්‍රියාත්මක නොවූ බවත් විමර්ශනවලදී අනාවරණය වී තිබෙනවා.
මෙම රථයේ හිමිකරුද අදාළ වාහනය නිසි පරිදි නඩත්තු කර නොමැති බවත්, මෝටර් රථ වාහන පනතේ 169 වන වගන්තියට අනුව මෙවැනි වාහනයක් ධාවනය කරන රියදුරෙකු පැය 8-12 අතර කාලයක් එම ධාවනයේ යෙදෙන්නේ නම් ඊට පෙර පැය දහයක විවේකයක් ලබාදිය යුතු බව සඳහන්ව තිබුණත්, අදාළ රථයේ හිමිකරු විසින් රියදුරුට එවැනි විවේකයක් ලබා දී නොමැති බව විමර්ශනවලදී කරුණු අනාවරණය වී ඇති බවයි නිලධාරීන් අධිකරණයට පවසා තිබෙන්නේ.
විත්තිය වෙනුවෙන් පෙනී සිටි නීතිඥවරයා අධිකරණය හමුවේ කරුණු දක්වමින්, සැකකාර රියදුරු කඩුවෙල දෙස සිට කිලෝමීටර් දහයක් පමණ කිසිදු ආබාධයකින් තොරව මෙම රථය ධාවනය කර තිබෙන බවත්, හදිසියේ තිරිංග අක්‍රියවීම ඔහුගේ පාලනයෙන් තොර කටයුත්තක් බවත්, ඔහුට මෙවැනි වාහනයක් පැදවීමට අවශ්‍ය කරන යෝග්‍යතා සහතික තිබෙන බවත් සඳහන් කර ඇති අතර අදාළ ලේඛනද අධිකරණයට ඉදිරිපත් කර තිබෙනවා.
අදාළ රථය පැදවූ අවස්ථාවේදී සැකකරු ගංජා පානය කර සිටි බවට පොලීසිය ප්‍රකාශ කළත්, එවැනි මත්ද්‍රව්‍යයක් ඔහු විසින් පානය කර තිබෙන්නේ දින හතරකට කලින් බවත්, අදාළ වාහනය පදවන අවස්ථාවේ ඔහු කිසිදු මත්ද්‍රව්‍යයක් පානය කර නොසිටි බවත්, තමන්ට හැකි ආකාරයෙන් ඔහු හානිය අවම කර ගැනීමට උත්සාහ කර ඇති බවයි නීතිඥවරයා වැඩිදුරටත් සඳහන් කර ඇත්තේ.
දෙපාර්ශ්වය විසින් ඉදිරිපත් කළ කරුණු සලකා බැලූ මහෙස්ත්‍රාත්වරයා, සැකකාර රියදුරු ලබන අගෝස්තු 07 වැනිදා දක්වා රක්ෂිත බන්ධනාගාර ගත කරන ලෙස නියෝග කර තිබෙනවා.
