Drugs – හෙරොයින් මත්කුඩු කුඩු ග්රෑම් 6.95ක් සන්තකයේ තබා ගැනීම සහ ජාවාරම් කිරීමේ චෝදනාවට වරදකරු කෙරුණු 37 හැවිරිදි දෙදරු පියෙකුට කොළඹ මහාධිකරණය විසින් අද (29) ජීවිතාන්තය දක්වා සිර දඬුවම් නියම කර තිබෙනවා.
2013 වසරේ අප්රේල් මස 07 වැනිදා කොටහේන ප්රදේශයේදී මෙම විත්තිකරු හෙරොයින් මත්කුඩු සමග අත්අඩංගුවට ගෙන තිබුණු අතර, ඉන් අනතුරුව හෙරොයින් මත්කුඩු සන්තකයේ තබා ගැනීම සහ ජාවාරම් කිරීම යන චෝදනා යටතේ නීතිපතිවරයා විසින් මෙම විත්තිකරුට එරෙහිව අධි චෝදනා ගොනු කර තිබූ බවයි සඳහන් වෙන්නේ.
දීර්ඝ නඩු විභාගයකින් අනතුරුව තීන්දුව ප්රකාශයට පත් කළ කොළඹ මහාධිකරණ විනිසුරු නවරත්න මාරසිංහ විසින් විත්තිකරුට එරෙහිව පැමිණිල්ල විසින් එල්ල කර තිබෙන චෝදනා සාධාරණ සැකයෙන් ඔබ්බට ඔප්පු වී තිබෙන බව සඳහන් කළ අතර, ඒ අනුව විත්තිකරුට ජීවිතාන්තය දක්වා සිර දඩුවම් නියම කරන බවත් ප්රකාශ කර සිටියා.
