Johnny Ruffo – Soap Home and Away රුපවාහිනි කතා මාලාවෙන් අතිශය ජනාදරයට පත්වූ ඔස්ට්‍රේලියානු රංගන ශිල්පියෙකු සහ ගායකයෙකු වූ Johnny Ruffo මොළයේ ඇතිවූ පිළිකාවක් හේතුවෙන් අද [10 වෙනි සිකුරාදා] මියගොස් තිබේ. කාලයක් තිස්සේ මෙම පිළිකා තත්වය සමඟ දරුණු සටනක නිරතව සිටි ඔහු මියයන විට වයස අවුරුදු 35 කි.
ඔහු මොළයේ පිළිකාවකින් පසුවන බව සොයාගන්නා ලද්දේ 2017 වසරේදීය. එතැන් පටන් ඔහු පිළිකාවන්ගෙන් පිඩා විඳින පිරිස් වෙනුවෙන් අරමුදල් එක්රැස් කළ අතර ඔවුන්ව දිරිමත් කිරීම සහ දැනුවත් කිරීම වෙනුවෙන් විවිධ වැඩසටහන් සංවිධානය කරන්නට කාලය ගතකර තිබිණි. පිළිකා රෝගයකින් පෙලෙන බව හඳුනාගැනීමත් සමඟම සිය වෘත්තීය ජීවිතයට සමුදුන් ජොනී රෆෝ, සමාජ සේවා කටයුතු වෙනුවෙන් වැඩි කාලයක් යොදවන්නට විය. 2019 වසර වනවිට ඔහුගේ රෝග තත්වය සාමාන්‍ය අතට හැරී තිබුණද, 2020 වසරේදී එය යළි උත්සන්න වන්නට පටන් ගෙන තිබිණි.
බටහිර ඕස්ට්‍රේලියාවේ පර්ත් නුවර උපත ලද ඔහු 2011 වසරේ X Factor රියැලිටි වැඩසටහනට එක්වීමත් සමඟ අතිශය ජනප්‍රියත්වයට පත්විය. ඊට අමතරව ඔහු කේවල ගීත කිහිපයක් නිකුත් කිරීමටත්, Dancing with the Stars හි වාරයක් ජයග්‍රහණය කිරීමටත්, Soap Home and Away කතා මාලාවේ Chris Harrington ගේ චරිතයට වසර තුනක් රංගනයෙනුත් එක්ව තිබේ. ඔහු මිය යෑමට ආසන්න කාලයේ Channel 10 නාලිකාව සමඟ සාකච්ජාවකට එක්වෙමින් පවසා තිබුණේ “පරීක්ෂණ වලින් මගේ උපරිම ආයු කාලය වසර තුනක් බව කියවුණා. එදා ඉඳලා මේ වෙනකොට මම වසර පහක් ජීවත්වෙලා තියනවා. ඉතිං දැනටමත් මං දිනුම් නේද?” යනුවෙනි. ඔහු මියයනතෙක් ඔහුව රැකබලාගනිමින් ජීවත්ව තිබුණේ ඔහුගේ සහකාරිය වූ Tahnee Sims විසිනි.
-BBC News ඇසුරෙනි- by Tiffanie Turnbull
Photo Credits: Back to the bay / Daily Express
